400 كیلۆمەتر ژ سنۆرێن د ناڤبەرا ئیراقێ و سووریێ دا ب دیوارێ كۆنكریتی هاتە دائێخستن
ئاژانسێن دەنگوباسێن ئیراقی بەلاڤكر، سەرۆكێ تۆرا راگەهاندنا ئەمنی یا ئیراقی، لیوا تەحسین خەفاجی، راگەهاند، دیوارێ سنۆریێ د ناڤبەرا ئیراقێ و سووریێ یێ هاتیە ب هێزكرن و 400 كیلۆمەترێن وی سنۆری یێن بووینە دیوارێ كۆنكریتی.
لیوا تەحسێن خەفاجی، سەرۆكێ تۆرا راگەهاندنا ئەمنی یا ئیراقی گۆت ژی» وەزارەتێن ناڤخوە و بەرگری ل ئیراقێ و فەرماندەیا ئۆپەراسیۆنێن هەڤپشك و دەستەیا حەشدا شەعبی، پێرابوونێن توند بۆ ب موكمكرنا رەوشا ئەمنی ل سنۆرێ د ناڤبەرا ئیراقێ و سووریێ دا د سێ سالێن بۆریدا یێن وەرگرتین».
ناڤبری باس ل بزاڤێن 24 ساتی یێن هەوالگیری و ئەمنی كر بۆ چاڤدێری و دووڤچوون و راهێلانا چەكداران و پاراستنا وی سنۆری، ژ بلی وان هێرشێن ئەسمانی ئەوێن ل دەڤەرێ ئەنجام ددەن.
لیوا تەحسین خەفاجی پتر گۆت» كۆنكریتكرنا دیوارێ سنۆرێ د ناڤبەرا ئیراقێ و سووریێ دا بۆ 615 كیلۆمەتران دێ هێتە زێدەكرن».
پشتی ژناڤچوونا رژێما بەشار ئەسەدی ل سووریێ و وەرگرتنا دەستهەلاتا وی وەلاتی ژ ئالیێ دەستەیا رزگاكرنا شامێ ڤە، حوكمەتا ئیراقێ سنۆرێن خوە ل گەل وەلاتێ سووریێ ب توندی یێن كونترۆل كرین.
