45 گوند و پشکەک ژ سەنتەرێ ئەڤێ ناحیێ ئاریشەیا نەبوونا ئاڤێ ھەیە
ئەڤرۆ نیوز ، نەوزاد ھلوری ، مورشید برادۆستی:
ئاریشەیا کێم ئاڤیێ ل سەنتەرێ ناحیا سیدەکان و ٤٥ گوندێن وێ ھەیە ، وەلاتی ددەن دیارکرن کو ھەموو سالەکێ ل وەرزێ ھاڤینێ ئاریشەیێن وان پتر دبن ، و رێڤەبەرێ فەرمانگەھا ئاڤا ناحیا سیدەکان ژی ددەتن دیارکرن کو ئەو یێ بزاڤان دکەن ئاریشەیا نەبوونا ئاڤێ ل سیدەکان و گوندێن وێ چارەسەر بکەن.
عەبدوللا شێخو ھەلبژێرێ گوندێ نزارە ل سنوورێ ناحیا سیدەکان گۆت: (ھەمو سالەکێ ب تایبەتی د وەرزێ ھاڤینێ دا ئەم توشی کێم ئاڤیێ دبین ، بەری نھا حکومەتێ ب تانکەران ئاڤ بومە دئینا بەلێ نھا تانکەر ژی ئاڤێ نائینن ، دخوازین کو حکومەت مە ژ قەیرانا ئاڤێ رزگار بکەت)
بیلال محەمەد ئەمین وەلاتیەکێ سەنتەرێ ناحیا سیدەکانە دیارکر کو ماوەیێ ١٠ سالایە تاخێ گولان ل سەنتەرێ ناحیا سیدەکان وەکو پێدڤی ئاڤ نینە و گۆت: (ل گورەی قانونێ مە خانویێن خوە درۆست کرینە بەلێ ھەتا نھا مە ئاڤ نینە و ژ ئاریشەیا ئاڤێ رزگار نەبوینە و چەندین جاران ژی مە ئاریشەیا خوە گەھاندیە حکومەتێ بەلێ ھەتا نھا چوو تشتەک دیار نینە ئەگەر ھەر وچو نەبیت بلا ب رێیا تانکەران ئاڤێ بومە دابین بکەن)
حامی خورشید رێڤەبەرێ فەرمانگەھا ئاڤا ناحیا سیدەکان بۆ ئەڤرۆ نیوز گۆت: (ئەم ژ نێزیک ھایدارێ ئاریشەیا ئاڤا چەند کولانەکێن سەنتەرێ ناحیا سیدەکان و نێزیکێ ٤٥ گوندێن سەر ب سیدەکانین ، چەندین جاران مە حکومەت و لایەنێن شولەژێ ب نڤیسارێن فەرمی ئاگەھدار کرینە بەلێ چوو دیار نینە)
زێدەتر گۆت: (حەفتیا بھێت دێ ب رێیا لژنەیەکا تایبەتمەند دەست ب ڤەدیتنەکا نو بو چەند کولانێن ناحیا سیدەکان کەین کو ئێک ژ وان کولانا گولانە ئەڤە سەرەرای کو پار سال ژی مە ڤەدیتنەک بو چەند تاخەکان کربوو بەلێ ژ بەر قەیرانا دارایی مە نەشیا بو ھەموو جھان بکەین ، نھا ناحیا سیدەکان ب رەنگەکێ بەرچاڤ بەر ب مەزنبوون و بەرفرەھبوونێ ڤە دچیت و پرانیا جاران ژی ئاڤا دەڤەرێ لسەر کانیێن ئاڤێ یە و ھەر دوو رۆژان جارەکێ ئاڤ بو خەلکێ دەڤەری َدھێتە بەردان بەلێ ژ بەرکو نھا ئەم د وەرزێ ھاڤینێ داینە رەنگە ئاڤا سیدەکان و گوندێن وێ بەر ب کێمتر ڤە بچیت ، ژبەرڤێ یەکێ داخوازێ ژ جھێن شولەژێ دکەین کو ب زوترین دەم ئاریشەیا ئاڤا دەڤەرێ چارەسەر بکەن ژبەرکو زێدەباری سەنتەرێ ناحیێ نێزیکێ ٤٥ گوندێن سەر ب سیدەکان ژی ئاریشەیا کێم ئاڤیی َھەیە و نھا ب چوو رەنگان دشیانێن مەدا نینە کو ئاڤا ئەوان گوندان چارەسەر بکەین)
