48 کیلۆگرامێن ژانێ
بەتوول ئەبو عەقلێن*
(1)
دەستێ من یێ شكەستی
جیهان دەستێ من یێ شكەستی
دگریت و دگڤێشیت.
من هەوللدا ببڕم، لێ نەشیام.
من ژبەر چاڤانێن وێ ڤەشارت،
لێ هەر دیت.
نها ئەو تڕانان پێدكەت..
تبلێن خۆ پێدا دئینت و دبەت..
هەوللددەم قێرینێن خۆ داقورچینم.
دپێچیت… ئەز هاوار دكەم.
دخۆرینیت… ئەز هاوار دكەم.
لێ دەما بڕی من ژ بنێ پیا كرە هاوار:
من دەستێ خۆ دڤێت..
ئەی خۆدێ من دەستێ خۆ یێ شكەستی دڤێت.
(2)
تەڕمێ من نانیاسی
ئەگەر ئەز نەمام، من بنیاسە:
ب گەردەنییا من یا شین، ئەگەر من گەردەن ما.
ب ددانێن من یێن خواروڤیچ، ئەگەر نەپەشین.
ب خالا ل سەر ملێ من، ئەگەر ژ قولێرێ ڕا دەرنەپەڕی.
یان ب پرچا من یا كورت و جوان بادایی، ئەگەر نەشەوتی.
ئەگەر ئەز یا ب بەخت ژی بم، دێ من ب رویكێ من نیاسی.
دێ بەرەڤ ئاسمانی یێ بلند بیت
داكو بۆ جارا ئێكێ همبەری سیمایێ خۆدێ بیت.
ـــــــــــــــــــــــــــــــــــــــــــــــــــــــــــــــــــــ
* (بەتوول ئەبو عەقلێن)، كچە جحێلەكا فەلەستینی ژ دایكبوویا سالا 2005 غەززە یە. هەر زوی د ژیێ بیست سالیێ دا كەتە د ناڤ جیهانا هەلبەستێ دا و ل جیهانێ دەنگڤەدا. خەلاتێ ئێكێ یێ (بارجیل) ل بەریكانا هەلبەستێن گەنجان ل ئیماراتێ، ب هەلبەستا خۆ (من ئەور نە دزینە.. I didnt stole the cloud) كو هێشتا ژیێ وێ 15 ساڵبوون، ب دەست خۆ ڤە ئینا. (بەتوول)، دبێژیت: (ئەم بۆ ژیانێ د نڤێسین.. ئەو ئاگرێ د سینگێ من دا پێدڤی ب پفەكێ بوو!). (بەتوول)، خودان دیوانەكا هەلبەستانە ب ناڤێ (48 كگم)، كو 48 هەلبەستان ب خۆ ڤە دگریت، ژ بۆ هەلبژاردنا ڤی ناڤی هەلبەستڤان دبێژیت: (ئەز كچەكا بێ قەلافەتم، سەنگێ من 48 كگم دبیت، و دیوان ژی 48 هەلبەستان دحەوینیت، و هەر هەلبەستەك ژی كیلوگرامەكە ژ لەشێ من). هەژی گۆتنێ یە، بەتوول دەرچوویا ئادابێ بەشێ زمانێ ئنگلیزی یە، و هەمی هەلبەستێن خۆ بۆ زمانێ ئنگلیزی وەرگێڕاینە.