50% پرۆژێ پیڤه‌رێن زیره‌كێن كاره‌بێ تمامبوویه
حه‌مۆ محه‌مه‌د:
وه‌زاره‌تا كاره‌با حوكمه‌تا هه‌رێما كوردستانێ ب مه‌ره‌ما كونترۆلكرنا زێده‌گاڤیێن ل سه‌ر تۆرا كاره‌بێ و ب هه‌ده‌ردانا وێ و زێده‌كرنا دانا ده‌مژمێرێن كاره‌با نشتیمانی بۆ وه‌لاتیان، ده‌ست ب پرۆژێ دانانا پیڤه‌رێن زیره‌كێن كاره‌بێ كر.
ئه‌ندازیار كه‌مال محه‌مه‌د سالح، وه‌زیرێ كاره‌بێ ل حوكمه‌تا هه‌رێما كوردستانێ سه‌رپه‌رشتیا كۆمبوونه‌كا شیره‌تكاری یا وه‌زاره‌تێ كر و دیار كر، پرۆژێ پیڤه‌رێن زیره‌كێن كاره‌بێ، ئێك ژ گرنگترین پرۆژێن وه‌زاره‌تێ یه بۆ كونترۆلكرنا زێده‌گاڤیێن ل سه‌ر تۆرا كاره‌بێ و ب هه‌ده‌ردانا وێ و باشتركرنا ره‌وشا كاره‌با نشتیمانی، دیسا بارگرانیا ل سه‌ر گوهۆرك و ویستگه‌هێن كاره‌بێ كێمبوویه.
وه‌زاره‌تا كاره‌بێ خویا كریه، هه‌تا نوكه نێزیكی 700 هزار پیڤه‌رێن زیره‌كێن كاره‌بێ ل سه‌رانسه‌ری هه‌رێما كوردستانێ بۆ پشكدارێن كاره‌با نشتیمانی هاتینه گرێدان كو دبیته 50% یا پرۆژه‌ی، ئه‌ڤێ چه‌ندێ ژی وه‌كریه كو ب هه‌ده‌ردانا كاره‌بێ و زێده‌گاڤیێن ل سه‌ر تۆرا كاره‌بێ و بارگرانیا ل سه‌ر گوهۆرك و ویستگه‌هێن كاره‌بێ كێم ببیت.
