500 هزار دار ب سێ قووناغان ل دهۆكێ دێ هێنە چاندن
ئەڤرۆ
ب سەرپەرشتیا ماجد سەید سالح، جێگرێ پارێزگارێ دهۆكێ و ب بەرهەڤبوونا دەڤەردارێ دهۆكێ و رێڤەبەریێن پەیوەندیدار ب ژینگەهێ ڤە، دوهی 20/2/2023 ل ئاڤاهیێ پارێزگەها دهۆكێ سێ كۆمبوون ئەنجام دان.
د كۆمبوونەكێ دا پلان هاتە دانان بۆ چاندنا 500 هزار نەمامێن داران ژ لایێ رێكخراوا (WFP) یا سەر ب نەتەوەیێن ئێكگرتی ڤە ب هەماهەنگی ل گەل حوكمەتا خوەجهی یا دهۆكێ و لایەنێن پەیوەندیدار، دیسا بەحس ل دەستنیشانكرنا جهـ و دەمێ چاندنا نەمامان و چاوانیا چاندن و رێنما و رێكارێن پاراستنا ڤێ هەوێ هاتە كرن، كو پڕۆژە ب سێ قووناغان دێ هێتە بجهئینان.
دیسا د كۆمبوونەكا دی دا بەحس ل رێكخستن و مۆهلەت وەرگرتنا دروستكرنا خانیێن گوندەواری هاتنە كرن، ئەوێن د ناڤ باغ و بیستانان دا دهێنە دروستكرن.
هەروەسا د كۆمبوونەكا دی دا بەحس ل وان رێكارێن رێگریكرن ل دیاردا سۆتنا كەلوپەلێن پلاستیكی و داروبارێن د ناڤ چەمێن سەنتەرێ پارێزگەها دهۆكێ و پاشماوەیێن گازێ دا هاتە كرن و دووپاتی ل وان رێنمایی و سزایان هاتە كرن، یێن كو ب ڤی كاری رادبن و دبنە ئەگەرێ تێكدان و پیسكرنا ژینگەهێ.
