56 هزار پارچەیێن ئەردی ل سەر فەرمانبەر و زیندانیێن سیاسی هاتینە بەلاڤكرن
دهۆك، دلۆڤان ئاكرەیی:
سەرپەرشتێ تیما هووربینی و ڕێكخستنا فۆڕمان بۆ بەلاڤكرنا پارچەیێن ئەردی ل وەزارەتا باژێرڤانیا هەرێمێ دیاركر، كابینەیا نەهێ یا حوكمەتا هەرێما كوردستانێ، ڕازیبوون دایە، كو ئەرد ل سەر 485 هزار فەرمانبەر و پێشمەرگە و كارمەندێن ناڤخۆ بهێتە بەلاڤكرن و دبێژیت: هەتا نوكە 56 هزار پارچەیێن ئەردی ب رێیا پشككێشانێ هاتینە بەلاڤكرن.
سەربەست مەولوود، سەرپەرشتێ تیما هووربینی و ڕێكخستنا فۆڕمێن بەلاڤكرنا پارچەیێن ئەردی ل وەزارەتا باژێرڤانییێ بۆ رۆژنامەیا ئەڤرۆ گۆت: «هەتا نوكە جڤاتا وەزیران ڕازیبوون ل سەر دانا پارچەیێن ئەردی بۆ 485 هزار فەرمانبەر و پێشمەرگە و كارمەندێن ناڤخۆ دایە، نوكە ژی شەش هزار ناڤێن دی ل جڤاتا وەزیرانن و ل نێزیك دێ زڤڕن و دووماهی لیستە ڕازیبوون ل سەر هاتیە كرن و پێشمەرگەیێن یەكەیا 70 و 80 نە».
گۆتژی: «پشكەكا مەزن یا ڕازیبوونا بۆ باژێرڤانییان هاتینە ڤەگەڕاندن، داكو ل دووڤ هەبوونا ئەردی پشككێشان بۆ بهێتە كرن».
