60% خەلك گرنگیێ ب خەونان ددەن
ئەڤرۆ
هەرهین محەمەد:
خەون نامەكا خودایی یە و هشیاركرنا مرۆڤی یە ل سەر خەلەتیەكێ، یان رویدانەكێ، یان مزگینیەكێ و گەلەك جورێن خەونان ژی هەنە و هەر خەونەكێ ژی راڤەكرنا خوە یا تایبەت هەیە، بەلێ هەموو خەون نابنە راستی، چونكو سرۆشتێ خەونان ئەوە بتنێ خەونێن دەمەكی دبنە راستی و دیسان خەونا هەی ژی چ راڤەكرن بۆ نینە ئانكو یا بەتالە.
رۆژنامەڤان سیپان جەمال، دەتە زانین كو هەموو كەس خەونان دبینن و خەون دەربرینا رەفتارێن مرۆڤی یێن رۆژانەیە و هەكە ئەو رۆژا مرۆڤی دەرباز كری یا خوش بیت و ئەو جهێ مرۆڤ لێ نڤستی یێ خوش بیت ئەو خەونا مرۆڤ دبینت دێ یا خوش بیت و بەرۆڤاژی ڤێ چەندێ هەكە رۆژا مرۆڤی دەربازكری یا نەخوش بیت دێ خەونێت نەخوش بینت، چونكو ل سەر وان هزریت نەخوش دنڤیت و گۆت: (گەلەك كەس هەنە دەمێ خەونەكێ دبینن و لدوڤ شرۆڤەكرنا رامانا وێ خەونێ دچن و دڤێت بزانن، بەلێ ئەس ل دوڤ ڤی تشتی ناچم، ژبەركو هەكە راڤەكرنا خەونێ یا نەخوش بیت دێ تێك چم).
شاناز ئدریس كچەكە خویا كر كو هەبوونا خەونێ ژ سرۆشتێ هەموو كەسان وەك ئێك نینە و دیتنی دا خەونێن پێغەمبەران سرۆشت (وەحی) بووینە و دشێن بێژین پەیاما خودێ بۆ دهات و گوت: (د نوكەدا خەون دیتن بوویە جهێ نەباوەریێ و ژبیركرنێ.
راڤەكەرەكێ خەونان ل تورا جڤاكیا فێسبووكی نەڤیا ناڤێ وی بهێتە دیار كرن دا زانین كو خەون ژحەفت هەتا یازدە چركا نابوریت و پتریا جاران حەونێن ب شەڤێ و بەری بانگێ سپێدێ دبنە راستی وخەون بۆ مرۆڤی وەكو ئیلهامەكێ و نامەكێ یە60% خەلك گرنگیێ پێ دەن ب تایبەت ل ڤێ دووماهیێ و كچ و كور هەردو دوڤچوونا خەومان دكەن دەمێ دبینن و حەز دكەن بزانن رامانا خەونا وان چیە و گوت: (هەكە خەون یا نەخوش بیت مرۆڤ بێژیت یارەبی ئەز خوە ب تە دپارێزم تو بەلا و موسیبەتا نەدەیە من).
راڤەكەرێ خەونا گۆتژی: (گەلەك جورێن خەونان هەنە و خەون هەیە د رۆژێ دا ئەو رویدانە دبنە راستی و خەون هەیە پشتی سێ رۆژان و ب سالێ ڤە ژی گرێدای بیت و مرۆڤ نەشێت رێژەكێ دیار كەت كو هەموو خەون دبنە راستی و هەر خەونەك ل دووڤ شێوازێ خوە دمینت و هندەك جاران خەون هەنە ناهێنە راڤەكرن و دبەتالن و هندەك جاران ژی خەون ژ هزرو خەیالان هاتیە و گەلەك جاران ژی خەون یا دروستە و وەكو نامەكێ بۆ وی كەسی هاتیە، چونكو خەون ئاگەهداری و مزگینی و هشیار كرنەكە بۆ مرۆڤی و ئەو كارو رەفتارێن دكەت).
راڤەكەری ئەو چەندەژی گۆت: (گەلەك جاران دەمێ خەون دهێتە راڤەكرن راڤەكەر بخو ژی نزانیت كا ئەو خەونە دێ بیتە راستی، یان نە و یا دروست ئەوە ئەو كەسێ خەون دیتی دڤێت گەلەك پسیار ژێ بهێنەكرن هەتا كو خەون ب دروستی بهێتە راڤەكرن).
