60 سالان من خزمەتا هونەرێ کوردی کریە
هونەرمەند و مۆزیکژەنێ مەزن و بناڤ و دەنگ یێ کورد بشار زاخۆیی د دیدارەکێ دا بۆ ڕۆژناما ئەڤرۆ دیارکر کو ئەز ل سالا 1945 ژ دایك بوویمە، ل ژیێ زاڕۆکاتیێ من حەز ژ هونەر و سترانا کوردی کریە، لەوما بۆ ماوێ 60 سالان من خزمەتا هونەرێ کوردی کریە، ل سالا 1995 چوویمە ژ دەرڤەی وەلاتی و ل وەلاتێ ئەلمانیا ژیایمە، لێ ئەڤە بۆ ماوێ چەندین سالانە ئەز ب ئێکجاری ڤەگەڕیایمە کوردستانێ و ل ئیدارا سەربخوە یا زاخۆ ئاکنجی مە، من سێ کۆڕ و سێ کچ هەنە.
ناڤهاتی ئاماژە ب وێ چەندێ ژی کر کو ئەز گەلەك ب دانانا مۆزیکێ ڤە ماندی دبووم، چونکی ئەز گەلەك پێڤە د مامە مژوول هەتا من مۆزیکەك بۆ سترانەکێ هەلبژارتبا، 20 سالان ئەز فێری ئامیرێ عودێ بووم کو ب شێوەیەکێ پێشکەفتی من زانی و من شیا مۆزیکێ و ئاوازان بۆ سترانان دانم، چەندین سترانێن من ناڤدار بووینە و کەڤتینە سەر زمانێ خەلکێ وەکو سترانا من نەزانی ڕێکا من هو یا ب زەحمەتە، و عەلیو لاوێ عەمەر، و ئەز کچم کچا کوردانم گولیلکا سەرێ لاوانم ژ پەیڤێن دکتۆر بەدرخان سندی و ژ ئاوازا منە و من و هونەرمەند گولبهارێ پێکڤە گۆتیە، و سترانا نەگری نەگری، دڤێت هونەرمەند کەسەکێ تێگەهشتی و شارەزا بیت.
گۆت ژی:»ئەز نوکە کێم گۆهێ خوە ددەمە سترانێن نوو، بەلکو پتر گۆهداریا سترانێن کەڤن یێن کوردی دکەم، ل دەمێ ئەز پەیڤان بۆ سترانەکێ دنڤیسم، ئەز گەلەك هزرا خوە تێدا دکەم و ژ نوو دنڤیسم، ژ بۆ وێ چەندێ کو کۆپلەیێن سترانێ د ڕێك و پێك بن و هەموو پێکڤە گرێدایی بن و ڕامانا خوە بگەهینیت».
زێدەتر ژی گۆت:»من گەلەك حەز ژ دەنگێ ئەیاز یوسڤی دکر و ڕۆژەکێ ئەز و ئەو پێ تڕۆمبێلا من ژ بەغدا هاتینە زاخۆ، ب ڕێکێڤە ئەو سترانێن من بۆ چێکرین دگۆتن، سترانا وی یا بناڤێ من دیت جارا عەولی من بۆ ئاواز کریە، هونەرمەندێن نەمر یێن کورد تەحسین تەها و عیسا بەرواری و محەمەد عارفێ جزیری و گولبهار و ئەیاز یوسڤ هەڤال و برادەرێن من یێن هونەری بوون».
