60% وەلاتی پووتەی ب ددانێن خوە نادەن
ئه‌ڤرۆ نيوز:
رێڤەبەرێ کۆمەلگەھا نوشداری یا ددانان ل دھۆکێ دیارکر کو رێژا 60% وەلاتی پووتەی ب ددانێن خوە نادەن ئەڤە بیتە ئەگەر ددانێن وەلاتیان درزن ژ نوو قەستا نوشداری دکەن د ئەنجام دا ژی چو چارەسەری نینن پێدڤیە نوشدار ددانی ژ دەڤێ نەساخی بینتە دەر.
د. نەجمەدین سەلیم بەرواری تایبەتمەندی نەخۆشیێن دەڤ و ددانان بۆ ئەڤرۆ دیارکر کو بەری ددان ب ئێشیت و بگەھیتە قووناغا پرکرنا رھێن ددانان پێدڤی یە وەلاتی سەرا نوشداری بدەت گەلەک باشترە، چونکو دێ نوشداری شیرەتان ل وەلاتیان کەت و ناھێلیت ددانێن وان بگەھنە قووناغا رزینی و ئینانا دەر ژ بەر کو چو جۆرێن ددانان وەکو وان ددانان نینن یێن د نیات دا د دەڤێ مرۆڤی دا ب تنی ھەکە وەلاتی چاڤدێریا ددانێن خوە بکەت چو جاران ددان نا رزن و پووچ نابن.
رێڤەبەرێ کۆمەلگەھا نوشداری یا ددانان ل دھۆکێ گۆت: دەمێ ددان دگەھیتە ئێشانی چو چارەسەری نینە پێدڤیە نوشدار وی ددانی دەربێخیت ئەڤە ژی ژ بەر خەمساریا وەلاتی یە چونکو ھەکە ھەر شەش ھەیڤان جارەکێ یان ژی ب کێماسی سالێ جارەکێ وەلاتی سەرا نوشدارێ ددانان بدەت بۆ پشکنینا ددانێن خوە ددانێ وی نائێشیت یان ژی ھەر چنە بیت ناگەھیتە قووناغا دەرئینانێ.
ناڤبری ئەو ژی دیار کر کو ل گۆر دیتنێن وان د ناڤ وەلاتیان دا ئەگەری سەرەکیێ پووچ بوونا ددانان و دەرئێخستنا ددانی ژ بەر خەمساریا وەلاتی ب خوەیە، چونکو ھەکە وەلاتی چاڤدێری و پشکنینا ددانێن خوە نەکەت و گەھشتنە قووناغا ئێشانێ، ئێدی فایدێ وان ناکەت رھێن ددانی بھێنە پرکرن، چونکو چو چارەسەری نینە، پێدڤیە نوشدار بینیتە دەر.
د. نەجمەدین سەلیم ئاماژە دا وێ چەندێ کو گەلەک ژ وەلاتیان دەمێ ددانێن وان درزن و دھێنە دەر ژ نوو گازندێ دکەن و دبێژن بھایێ ددانان یێ گرانە،
دەربارەی بھایێن وان ژی تایبەتمەندێ نەخۆشیێن دەڤ و ددانان گۆت:ل دووڤ کارێ نوشداری دمینیت، بھایێ ددانی ژ 150 ھزاران دەست پێ دکەت ھەتا 300 ھزار دیناران ددان دھێنە چاندن نوکە ل پارێزگەھا دھۆکێ باشترین زانستێ پرکرنا رھێن ددانان و چاندنا ددانان دھێتە کرن لێ یا ژ ھەموویێ گرنگتر ئەوە وەلاتی بەردەوام چاڤدێریا ددانێن خوە بکەن ئەو ژ ب تنی پشکنینا ددانان ل کلینیک یان نەخۆشخانێن ددانان ئەم بەردەوام شیرەتان ل وەلاتیان دکەن لێ پێگیریێ پێ ناکەن دێ ددانێن وەلاتیان ئێشن ژ نوو دێ بھایێ ددانی زانن، ئەڤە شاشیەکا مەزنە وەلاتی دکەن، گەلەک فەرە ھەر شەش ھەیڤان جارەکێ مرۆڤ ددانێن خوە پشکنین بکەت چونکو دێ ددانێن مرۆڤی د پاراستی بن ژ ھەموو ئێش و نەخۆشیان د ڤی حالەتی دا دێ مرۆڤ ژی پاراستی بیت چونکو ددان گەلەک یێ ھەستیارە پێدڤیە خەلک فێر ببن چاڤدێرێ و پشکنینا ددانێن خوە بکەن”.
