600 خێزانێن ئاوارە دێ ڤەگەڕنە شنگالێ
دهۆك، لەزگین جوقی
رێڤەبەرێ كۆچ و كۆچبەران و بەرسڤدانا قەیرانا ل پارێزگەها دهۆكێ راگەهاند، د ماوێ 7 رۆژاندا 600 خێزانیێن ئاوارێن شنگال داخوازیێن خۆ بۆ ڤەگەریانا شنگال پێشكێش كرینە و هەر ئاوارەكێ بڤێت ڤەگەرنە شنگال هیچ ئاستەنگە نینە، یێ بڤێت بمینیت ژی هیچ ئاریشەك نینە.
پیر دەیان جەعفەر، رێڤەبەرێ كۆچ و كۆچبەران و بەرسڤدانا قەیرانا ل پارێزگەها دهۆكێ راگەهاند: ل رۆژا 14/5/2023ێ كۆمبوونەك ل سەر ڤەگەریانا ئاوارێن شنگال دهێنە ئەنجامدان و مەرەم ژ كۆمبوونێ ئەوە هەموو ئاسانكاری بهێنە كرن د گەل وان خێزانێن بڤین ژ كەمپان ڤەدگەرنە شنگال، ئاوارە د ئازادن بۆ ڤەگەریانا شنگال و هیچ كێشە و ئاریشەك نینە، یێ بڤێت ڤەگەرت ئاسانكاری دگەلدا دهێنە كرن، یێ بڤیت بمینیت ژی هاریكاری دگەهنێ.
عیسا شەمعون، ئێكە ژ ئاوارێن شنگال دیار كر، هەكە خانیێن مە دروست بن و رەوشا شنگال ئارام بیت، ئەم هەموو دێ ڤەگەرینە سەر مال و جهێن خۆ، ئەڤە هەشت سالن ئەم ئاوارە و حۆكمەتا هەرێما كوردستانێ و خەلكێ كوردستانێ هەڤكاری و پشتەڤانیا مە دكەن و ئەڤە ناهێتە ژبیركرن، نوكە ئەم چاڤەرێ حۆكمەتا عیراقێ دكەین بۆ باشكرنا رەوشا شنگال و هیڤدارین رێكەفتنا شنگال بجه بهێت و رەوش باش بیت، دا ئەم بشێین ڤەگەرین».
شەریف سلێمان، سەرۆكێ لیژنا كۆچ و كۆچبەران ل پەرلەمانێ عیراقێ راگەهاند: وەزارەتا كوچ و كۆچبەرێن عیراقێ د كەیسا ئاواران دا دا كەمتەر خەمی بوویە و ئاوارە هاتینە پشتگوه هاڤێتن ژلایێ عیراقێ ڤە، هەكە كێشەیا شنگال چارەسەر نەبیت دێ گەلەك ئاریشە ل شنگال روودەن.
ئاشكەرا كر: حۆكمەتا عیراقێ ب دروستاهی د كەیسا شنگال دا كار ناكەت، پێدڤیە بۆدجەكا تایبەت بۆ زڤرینا ئاواران بهێتە تەرخانكرن و هەتا نوكە 450 هزار خێزان یێن زڤرینە باشیك و بەحزانێ و دەڤەرێن سەر ب نەینەوا ڤە و هێشتا حۆكمەتا عیراقێ خەلكێ زەرەرمەند قەرەبوو نەكریە».
