70٪ ژ گەنجان دناڤ رێكخراوان دا كار دكەن
بێوار حەمدی:
بەرپرسێ تورا هەماهەنگیا رێكخراوان د دیدارەكێ دا بۆ رۆژنامەیا ئەڤرۆ دیار كر كو نها دەلیڤەیا كاركرنێ بۆ گەنجان ل كەرتێ گشتی گەلەك یا كێمە و گۆت: نوكە 70٪ ژ گەنجان دناڤ رێكخراوان دا كار دكەن و دڤێت گەنجان پتر ڕول و بەهرەیا خۆ د رێكخراوان دا هەبیت.
سیروان گەردی، بەرپرسێ تورا هەماهەنگیا رێكخراوان CNO د دیدارەكێ دا بۆ رۆژناما ئەڤرۆ دیار كر كو ب شێوەیەكێ گشتی گەنجێن مە د پشكدارن دناڤ رێكخراوێن مەدەنی یێن حكومی و ناحكومی دا و گۆت: (هەتا نوكە نێزیكی 6 هزار رێكخراوێن جڤاكێ مەدەنی هەنە، لدویڤ وان ڤەكۆلینێن مە كرین ب ڕێژەیا 70٪ گەنج دناڤ ڤان رێكخراوان دا كار دكەن و دامەزرێنەرێن رێكخراوانە)
گەردی د بەردەوامیا ئاخفتنێن خودا دیار كر كو دوو جورێن رێكخراوان هەنە، رێكخراوێن نە حكومی و رێكخراوێن پیشەیی و یجەماوەری، یێن پیشەی ژی ئەون یێن كۆ سەندیكا و كومەلا و ئێكەتیان بخۆڤە دگرن و یێن جەماوەری ژی تایبەتن ب قوتابیان و گەنجان وئافرەتان ڤە و گۆت: (ئەو رێكخراوێن سەر ب پارتێن سیاسی ژیڤە رول و كاریگەریەكا مەزن هەبویە ب تایبەت ئێكەتیێن قوتابی و لاوان و ئافرەتان).
سیروان گەردی ئەو چەندە ژی دا زانین كو د نوكەدا گەنجان گەلەك كێم دەرفەتا كاركرنێ ل كەرتێ گشتی هەیە، لەوما دڤێت رولێ خۆ و بەهرەیا خو د رێكخراوەكێ دا بلند بكەت، هەتا ب خۆبەخشی ژی بیت دڤێت ئەزمونا كارێن رێكخراوەیی هەبیت و گۆت: (پێدڤیە گەنج خۆ فێری كارێ خۆبەخشیێ بكەت هەكە خو بو ماوەیەكێ كێم ژی بیت، داكو بشێت پتر خو د كاركرنێ دا شارەزا بكەت و پاشەرۆژەكا باش لبەر سینگێ خۆ ببینیت).
