71 سال ل سهر كهفتنا كۆمارا كوردستانێ بۆرین
چهند مفا ژ شكهستنا كۆمارا كوردستان هاته وهرگرتن؟
ئهڤرۆ، سالار دۆسكى:
حهفتێ و ئێك سال ل سهر شكهستنا كۆمارا كوردستان دا ب سهركێشیا پێشهوا قازى محهمهد دا دبۆرون، چاڤدێر و رهوشهنبیرێن كورد ل سهر هۆكارێن شكهستنێ و مفا وهرگرتنێ بۆچوونێن خوه ههنه.
سامى رێكانى چاڤدێرێ سیاسى، ل سهر هۆكارێن شكهستنا كۆمارێ و مفا وهرگرتن ژ شاشیێن وى سهر دهمى بۆ رۆژناما ئهڤرۆ گۆت: ل سهر ئاستێ هزركرنێ مه مفا ژێ وهرگرت، لێ مفا وهرگرتن دا دوباره ئهو رهفتار دوباره نهببنه ڤه، ئهڤێ چهندێ ئهم نهشیاینه و ههتا رادهكێ مهزن ژى مفایى ژێ وهربگرین، ئهگهر ژى ئهو بوویه ئێكگرتنهكا كوردى نهبوویه، جڤاكهكێ كوردهوارى یێ پارچه پارچهكرى بیت گهلهك یا ب زحمهته كۆمبین ل سهر ئێك بریار د ئێك قووناغ دا.
سامى رێكانى ئهو ژى گۆت: پێدڤى یه ل سهر ئاستێن ناڤچهى رێكهفتنهك مه ههبیت، یان ژى پشتهڤانێن و هاریكارێن ئێك دو بین و نهبینه قوربانى بۆ جههكێ دى و پێدڤى یه خالێن ههڤپشك بگههینه ئێك، كا دێ چاوا خوه نێزیكى ئێك دو كهین.
ئارى هرسن ئهندامێ پهرلهمانێ كوردستانێ گۆت: نهشیاینه مفایى ژ سهربۆر و شكهستنێن كۆمارا مهاباد وهربگرین، چونكو ئێك ژ هۆكارێن شكهستنا كۆمارا كوردستان ب سهركێشیا پێشهوا قازى محهمهد كومهكا هۆزێن كوردى ل دهردورێن مهابادێ دژى كۆمارێ چهك ههلگرتن و خیانهكر و ل گهل لهشكرێ ئیرانێ هێرش كره سهر كۆمارا مهاباد و ئهم نهشیاین مفایى ژ ئهڤێ چهندێ وهربگرین و ههموو جاران دیرۆك دوباره دبیته ڤه.
ئارى هرسن گۆت: ل سالا 1964 مهكتهبا سیاسى یا پارتى بهرامبهر مهلا مستهفا بارزانى راوهستیان، ل سالا 2017 كۆمهكا دى بهرامبهر گوڕێ مهلا مستهفاى، مسعود بارزانى راوهستان و دهمێ مهسعود بارزانى دگۆت باوهریا خوه ب حوكمهتا عیراقێ نینن و نه جهێ باوهریێ یه و كهسهكێ گوهدارى نهكر و چهندین سالان ههوار كر و مه چ ئاریشێن كهسۆكى نینن گهل بهغدا.
ههمان ئهندامێ پهرلهمانێ كوردستانێ گۆت: ههر دهم دیرۆك دوباره دبیت، چونكو پشكهكا مه خیانهدكر و ئهڤێن خیانهكرى ب تنێ دڤێت بۆ ههلبژارتنان عهرهب دهنگى بدهنێ ههكه ههر كوردهكێ ب شهرهف بیت دهنگێ خوه نادهتێ.
نڤیسهر تهحسین ناڤشكى، ل سهر مفا وهرگرتن ژ شاشیێن كۆمارا كوردستان گۆت: ل وى دهمى ئابوورێ كۆمارا ساڤا بهرامبهر ئابوورێ ههرێمێ ب چو رهنگان نه دهاته بهرواردكرن. نها حزبێن مه كوردینى ژ بیرا خهلكى بیر و مانه ب كهلهپیرتى و مالێ دونایێیڤه.
تهحسین ناڤشكى هێشتا گۆت: ژئالیهكى دى بهرژهوهندیێن دهولهتێن ئهقلیمى و و زلهێزان ههمان بهرژهوهندینه. هینگێ ژى ههر رێكهڤتنێن ئێكهتیا سۆڤیهتیا جاران ل گهل وهلاتێن رۆژئاڤا فاكتهرهكى ب هێز بوو كۆمار ههلوهشاندى و نها ژى ههمان بهرژهوهندینه كوردان دفرۆشن و سهیر ئهوه كورد ههر بهردهوامن ل سهر چهتهیا خوه د بهرژهوهندیا وان دا.
د.عهبدولحهمید باڤى ئهندامێ خۆلا بۆرى یا پهرلهمانێ عیراقێ گۆت: مخابن ههتا نوكه وهك مللهتێ كورد نهشیاینه مفایى ژ سهربۆر و شاشیێن خوه یێن پێشتر وهربگرین و ههردهم خالا لاواز مللهتێ مه ئهوه ئهم كورد ئێك دهنگ و ئێكرێز نین، ئهم بۆ خهلكێ بیانى وهك تورك و عهرهب و فارسان گهلهك رێزێ لێ دگرین و بهرامبهر خوه ئهم چنین و قهیمهتى نادهینه ئێكودو.
باڤى ئهو ژى گۆت: پێدڤى یه زانایێن مللهتێ مه نوكه كارى ل سهر ئهڤێ چهندێ بكهن ڤیانا مه بۆ مللهتى دمێشكێ مرۆڤێ كوردان دروست بكهن، داگیركرنێ ژ مێشكێ مه بینتهدهر و نه ب تنێ ئاخا مه داگیر كریه بهلكو زمان و كهلتۆر و شارستانیهكا مللهتێ مه ژى داگیر كریه و مێشكێ مه ب گشتى هاتیهداگیركرن، مخابن ل دهف هندهكا خزمهتا داگیركهرى نه شهرم و نهعهیبه و ئهڤه شاشیا ههره مهزن و پێدڤى یه ئهڤه ل بهرچاڤ هاتبا وهرگرتن بلا دبرسى و تێنى بین ب تنێ دئازاد بین و مخابن ئهڤه پتر ژ 100 سالێن خهباتێ مه برین ههتا گههشتینه ڤێ قووناغێ و چاوا ئهو خیانهتا 16ى ئهكتوبهرێ هاتهكرن و ههموو دوژمنێن مللهتێ كورد بوونه ئێك و بێدهنگیا وهلاتێن زلهێز و جڤاكێ نیڤدهولهتى شكهستن كهفته ناڤ مللهتێ مه، چونكو دهستێ خیانهتێ د ناڤ مه دا بوو، ههكه مه وانه ژ شكهستنا كۆمارا كوردستان وهرگرت با ئهڤه دڤیبابا دروست نهبا، تشتێ نهخوهش ئهڤێن ئهڤ كاره كرین ههما ب ئاشكرا بێژن و بهرهڤانیێ ژ شاشیا خوه ناكهن و ئهڤه كارهكێ گهلهك مهزن و بخوه ب سهرفهرازى دزانن و ئهڤه نه تشتهكێ بچووك بوو كو ئهو ئاخا ب خوینا شههیدان هاتیه رزگاركرن و ب چهند دهمژمێران مه رادهستى دوژمنى كر.
