72 پڕۆژه د سالا بۆری دا ل باژێرێ دهۆكێ هاتینه ئهنجامدان
ئهڤرۆ، نهوزاد هلۆری:
سهرۆكاتیا باژێرڤانیا دهۆكێ دیاركر، د سالا 2022ێ دا ل سهنتهرێ باژێڕێ دهۆكێ 72 پڕۆژهیێن جودا ب گوژمێ نێزیكی 38 ملیار دیناران هاتینه ئهنجامدان و كۆمهكا پڕۆژهیێن دی ژی د قووناغێن بجهئینانێ دانه.
ئیسماعیل مستهفا، بهرپرسێ راگههاندنا سهرۆكاتیا باژێرڤانیا دهۆكێ د داخوانیهكێ دا بۆ رۆژناما ئهڤرۆ گۆت: (د سالا 2022 دا ل سنوورێ باژێرڤانیێن رۆژههلات و رۆژئاڤا یێن سهر ب سهرۆكاتیا باژێرڤانیا دهۆكێ ڤه 72 پڕۆژهیێن جودا ل سهنتهرێ باژێرێ دهۆكێ ب گوژمێ 37 ملیار و 840 ملیۆن دیناران هاتینه ئهنجامدان، ههژمارهكا دی یا پڕۆژهیێن جودا ژی د وارێ بجهئینانێ دانه، ژ وان پڕۆژهیان ژی حهفت پڕۆژه ژ لایێ وهزارهتا باژێرڤانی و ههشت پرۆژه ژی ژ لایێ پارێزگهها دهۆكێ ڤه هاتینه ئهنجامدان، دیسا داهاتێ باژێرڤانیێ ژی ملیارهك و 818 ملیۆن دیناربوون).
زێدهتر گۆت: (سالا بۆری رۆژانه ل سهنتهرێ باژێرێ دهۆكێ 473ێ تهنێن بهرمایكان ل مالێن وهلاتیان دهاتنه كۆمكرن و رهوانهكرن بۆ كارگهها جوداكرنا وان ل دهڤهرا كواشێ، كۆما گشتی دبیته 172 هزار و 730 تهنێن بهرمایكان، نێزیكی 938 ههوێن راكرن و پاقژكرنا بهرمایكان ل سنوورێ باژێرڤانیا دهۆكێ د ناڤ سهنتهری و دهورۆبهر هاتینه ئهنجامدان، زێدهباری ههوێن پاقژكرنا ئاڤ و سۆلین و جهێن گشتی و سهیرانیان، ههژمارهكا زۆر یا ههوێن چاندنا داران و گول و فریزی ل جهێن گشتی و رهخ و روویێن جاده و پاركان هاتینهكرن بۆ هندێ رێژا كهسكاتیێ زێده بیت و سیمایێ باژێری جوان بیت).
ناڤبری دیار كر ژی كو 127 خانیێن زێدهگاڤی هاتینه تاپۆكرن و پروسه ژی یا بهردهوامه و گۆت: (چهندین جهێن جودا ژ بهر زێدهگاڤیان هاتینه خراپكرن، بهلێ ههمبهر سالا 2021ێ كێمتر بووینه، دیسا مولهت ب سێ هزار و 693 خانی و ئاڤاهیان هاتیهدان و پڕانیا وان ژی ئاكنجیبوون و بازرگانی بوون، دیسا د سالا بۆری دا ل گورستانا شاخكێ 817 كهس هاتینه ڤهشارتن).
