75 ساڵێن خوه نه‌چه‌ماندنێ
سالح حكیم
دیرۆكا كوردان یا پڕه ژ نه‌هامتی و روودانێن گرنگ، كو بووینه هێڤێنێ گه‌له‌ك هیڤیان، بۆ مه‌یینا كوردان، كو باشتر بشێن خوه بینه پێش د جیهانا ئه‌ڤرۆ دا، تایبه‌تی ژی ل رۆژهه‌لاتا ناڤین، چه‌ند سه‌رده‌مێن گوهۆرینێ ب سه‌ردا هاتینه، ژ وان روودانێن گرنگ بۆ گه‌لێ كورد دامه‌زراندنا پارتی دیمۆكراتی كوردستان پێنه‌ڤێت بوویه پر و رێ خۆشكه‌ر بۆ بهێزكرنا كوردان هه‌بوونا خۆزا بۆ هه‌موو سه‌ره‌ده‌ست و هه‌ڤسنۆران سه‌لمان بزاڤا پارتی هه‌ر ژ كه‌ڤندا دیاركرنا سنۆرێن كوردستانێ بووینه هه‌ر ب سه‌ركردایه‌تیا كه‌سه‌كێ خوه‌دی هزرا نه‌ته‌وه‌یی، مینا سۆمبولێ كوردان، جه‌نه‌رال مه‌لا مسته‌فا بارزانی، ل 16 ته‌باخا سالا1946ان و پشتی ئه‌وان هه‌می زۆلم زۆرییا ب سه‌رێ كوردان هاتی، ژلایێ رژێمێن ئیراقێ و ئیرانێ ڤه، پ د ك.هاته دامه‌رزاندن، دامه‌زراندنا پارتی ژی بریارا ته‌ڤایا هه‌ڤال و ئه‌ندامێن وێ پارتێ بوویه، ب سه‌رۆكاتیا بارزانیێ باب، ب ڤێ چه‌ندێ، ئه‌ڤ پارت بوو كه‌له‌مێ چاڤێ دوژمنێ گه‌لێ كورد، و شیایه ببیته پارته‌كا نه‌ته‌وه‌یی ب درووشمێ دادپه‌روه‌ری و پێكڤه‌ژیانێ، كه‌فته د خزمه‌تا هه‌موو ته‌خوچینێن جڤاكێ كوردی دا. پارتی وه‌كو دیار د چه‌ندین قووناغێن سه‌خت دا بۆریه، لێ هه‌تا ئه‌ڤرۆ ژی، خوه بۆ دوژمنێ گه‌لێ كورد نه‌چه‌ماندیه و به‌رده‌وام به‌ر ب پێشڤه دچیت، مێژوویا پارتی یا پڕه ژ ده‌ستكه‌فتان، بۆ گه‌لێ كورد. بێگومان ئه‌ڤه ده‌ستكه‌فتێن هه‌نێ ب ساناهى نه‌هاتینه، به‌لكو ب سایا خوینا شه‌هیدان بوویه، وه‌كو دیار كو پارتی خودانا هزاران شه‌هیده، سه‌ره‌رای ئه‌ڤان هه‌می ئاسته‌نگ، و قووناغێن سه‌خت یێن پارتی تێدا ده‌ربازبووی، پارتی ته‌حه‌مولا هه‌می وان نه‌خۆشیان كریه و بوویه پارته‌كا سه‌ره‌كی و بێ هه‌ڤڕك ل باشۆرێ كوردستانێ، ئه‌ڤه هه‌می ژى ب پشته‌ڤانیا هه‌ڤال و دۆست و لایه‌نگرێن وێ بوویه. هه‌ر بوویه پارتی خوه ب په‌رپرسیار زانی، كو ریفراندۆما سه‌رخوه‌بوونێ ئه‌نجام بده‌ت، داكو ملله‌تێ كورد ب ئازادانه بریارێ بده‌ن، هه‌روه‌سا ته‌عدداییێ ژ كه‌سێ قه‌بوول نه‌كه‌ت، ب ڤێ چه‌ندێ، ئاسته‌نگه‌كا دی بۆ پارتی هاته پێش، به‌لێ ڤێ جارێ ژ ئالیێ پارتێن كوردی ب خوه بوویه، كو ریفراندۆم كره به‌هانه بۆ پارتی كو تاكلایانه بریاردایه، و ئه‌و دگه‌ل ڤێ پرسێ نه‌بووینه، لێ پارتی هه‌ر ژ ئه‌ڤێ به‌رپرسیاریه‌تیێ نه‌ره‌ڤی، به‌لێ پتر خوه ب خودانێ ئه‌ڤێ پرسێ دانا هه‌موو ژی ژ پێخه‌مه‌ت گه‌لێ كورد، ل دوماهیێ ب بیره‌وه‌رییا دامه‌زراندنا پ.د.ك. هزار سلاڤ ل سه‌ر گۆرێ ته‌ڤاییا شه‌هیدێن كوردستانێ بیت. ئه‌وێن جانێ خوه به‌خت كرین، بۆ رزگاربوونا ئاخا كوردستانێ.
