800 كەس ل پارێزگەها دهۆكێ دێ بنە خودانكار
هەرهین محەمەد:
د. هەڤال سەدیق، رێڤەبەرێ گشتی یێ وەبەرهێنانێ ل پارێزگەها دهۆكێ بۆ ئەڤرۆ دیار كر، هەژمارا مۆلەتان د سالا بۆری دا ژ هەموو سالان پتر بوو، ژ بەركو حكومەتا هەرێما كوردستانێ، ب تایبەت كابینەیا نەهێ و سەرۆكێ حوكمەتێ چەند بڕیار دەركرن و ئەو بڕیارە بوونە كارئاسانی بۆ وەبەرهێنەران و زێدەبوونا پڕۆژەیان و خەلك ژی بوونە خودانكار و دەلیڤەیێن كاری ژی بۆ وەلاتیان پەیدا بوون.
رێڤەبەرێ وەبەرهێنانێ ل دهۆكێ گۆت: «مە پلانا سالا بۆری بجهئینا، مە مۆلەت دا 45 پرۆژەیان د بیاڤێن جودا دا، وەكو: چاندن و گەشتیاری و قوتابخانە و وەرزشی و هتد.. پڕۆژە ژی ل سەر سەرانسەری قەزا و ناحیێن سەر ب پارێزگەها دهۆكێ ڤە هاتینە بەلاڤكرن، هندەك ژ وان پڕۆژەیان كەفتینە د وارێ بجهئینانێ دا و ئەوێن مایی ژی دێ كەڤنە د وارێ بجهئینانێ دا، ب رێیا ڤان پڕۆژەیان، ل سەرانسەری پارێزگەهێ 800 كەس دێ بنە خودانكار و دەلیڤێن كاری دێ پەیدابن، ب شێوەكێ نەراستەوخو ژی گەلەك دێ ژ ئەڤان پڕۆژەیان مفاداربن».
گۆتژی: «د ئەڤ سالە دا مە 117 پڕۆژەیێن پەسەندكری هەنە، ئەرد ژ لایێ لایەنێن پەیوەندیدارڤە بۆ هاتیە تەرخانكرن».
