پێشمهرگه… دڤێت سزایێ خاكفرۆشان بدهت
فارس عیسا خێلهخى
ئێك ژستوونێن بنهڕهتى یێن پاراستنا ئاسایشا ههر وهلاتهكێ، هێزاوێ یا لهشكری یه، دهمێ ب شێوێ سیستهمى هاتبیته پێكئینان و ب زانست و تهكنهلوژیا نوو و پێشكهفتى هاتبیته چهكداركرن، ب من: ژ وێ گرنگتر پهرهوهرده و ئاڤاكرنا كهسایهتیا سهربازییه ل سهر وێ بیڕوباوهریێ، دڵسوزیاوى بۆ “ئاخ، وهڵات، مللهت”ێ وى بهێزتر بیت ژههموو بهرژهوهندیهكا دیتر، بشێت خوه ژ شهرعیهتا شۆرهشگێرى بۆ دهولهتداریێ دهرباز بكهت، چونكو شێواز و ئهركێ خهباتا شۆرهشگێرى بۆ دهم و ئارمانجهكا دیاركرى دهێته پهیرهوكرن، ئهڤجا رزگاركرنا مللهتهكێ و دهولهتبوونا وێ بیت یان گۆهورینا رژێمهكێ وسیاسهتاوێ بیت.
فهیلهسـوفێ ئیتالى “نیكولو ماكیافیللى” د پرتووكا خوه دا ب ناڤێ”میرێ مهزن” دبێژیت ” ئهگهر هێزا لهشكرى رێخستى نهبیت و ب فهرمانێن فهرماندهیێن خوه پێگیرنهبن، ل دهمێن مهترسى و شهڕاندا زۆربهیاوان درهڤن و ئامادهنابن بهرهڤانیێ بكهن،ٍ چونكو ل دهمێن ئاشتیێ دا سهربازن، مهبهستا وان دابینكرنا ژێدهرێ ژیارێ یه”، ههروهسا دۆپات دكهت “ئهو جۆره هێزه ب ساناهى ژ لایێ لایهنێن دهرهكى ڤه بهرامبهر پارهیى و ههر بهرژهوندیهكا دیتر دهێنه دهستێوهردان و پرت و بهڵاڤ دبن”.
مخابن ئهڤ بۆچوونه دگهل ژیوارێ كوردستانێ دگۆنجیت، مینا پشكهكا هێزا پێشمهرگهیێ كوردستانێ، ئهوێن وهك لایهن سهر ب ئێكهتیا نیشتمانى ڤه، بهلێ ل شوونا پێشمهرگهیان، فهرمانده و بهرپرسێن وان درهڤن و خوهدفرۆشن، وهك نموونهكا زیندى، هژمارهكا بهرپرسێن وان یێن “كێم فام و ناپاك” دگهل هژمارهكا “فهرماندهیێن ترسنۆك و خوهفرۆش” ل 16ێ ــ ئۆكتۆبهرێ ب ناپاكیهكێ ل دووڤ پلان و پیلانهكا پێشدهم ژ لایێ ئیرانێ و ب سهرپهرشتیا ڕاستهوخوهیا فهرماندێ فهیلهقا قودسێ “قاسم سولێمانى”، نه ب تنێ زارۆكێ دهولهتێ كو نێزیك بوو ژدایك ببیت ژبهربرن، بهلكو (52%) ژئاخا “كوردستانا باشوور”بێ بهرامبهر وهك دیارى ڕادهستى میلیشایێن ئیرانێ كرن، زێدهى ڤێ، دگۆتن، پێشمهرگهیان چو رۆل نهبوویه د پاراستنا سنوورێ كوردستانێدا، ههروهكو برازایى جلال تاڵهبانى، ئاڕاسێ كوڕێ چهنگى ب كهنیهكا ئاست نزم ڤه ب مهبهستا پهردهپووشكرنا ناپاكیا دگهل بنهماڵا خوه ئهنجام دایى، دگۆت “پشتى فرۆكهیێن ههڤپهیمانان داعش ژناڤ دبرین، ژنوو پێشمهرگه دچوون ل سهر لهشێن داعشان سێلفى دگرتن”، واته ل دووڤ تێروانیناوى، پترى 1600 شههێدێن شهڕێ داعشێ و پترى 10 دهه هزار بریندارێن پێشمهرگهى، نه ژبۆ پاراستنا سنوورێ كوردستانێ بوویه، بهلكو ژ ئهنجامێ كێبركیا گرتنا سێلفیابوویه ل سهر لهشێن داعشان.
گهلۆ….چو شهرمزاریهكه دناڤا خهلكێ كوردستانێدا، نهمازه ل باژێرێ ب ناڤ “شارێ ههڵمهت و قۆربانیێ” و “پایتهختێ ڕهوشهنبیریێ” ناپاكى بوویه فهرههنگ و ب ئاشكرایى دهێتهكرن، ناپاك و خوهفرۆش، وان ناڤچهیێن ڕادهستى دوژمنان كرین، ب ناڤچهیێن ئازادكرى ب ناڤ دكهن، ههروهكو “بافێل جهلال تاڵهبانى” بێ شهرمانه د پهیجێ خوهدا ب ناڤچهیێن ئازادكرى تهكهز لێ كرى، واته ” كهركووك، خانقین، مهندهلى، مهخمۆر، باشیقه، زمار، شنگال،….”، دهمێ دبن كونترولا پێشمهرگهیى دا ب تێروانینا وان ناڤچهیێن داگیركرى بوون، ژنوو ل 16ێ ـــ ئۆكتۆبهرێ میلیشیایێن ئیرانێ ئازادكرینه!، ئهڤ بوێرى و بێ رێزى ژئهنجامێ نهبوونا دهسهلات و هێزا یاسایێ یه ل كوردستانێ وان ڕهسوا بكهت و ب ناپاكیا مهزن دادگایى بكهت.
ب من ئێدى قۆناغا بهر ب ههڵبژارتن و دهنگدانێ یه، ئهگهر خهلكێ كوردستانێ ڕاستگۆبن و ب وێ خوهفرۆشیێ دڵتهنك و رازى نهبن، دڤێت دهنگێ وان، نهخاسمه دهنگێ پێشمهرگهیى كو دهربرینێ ژ ئازادیێ و ئازایهتیێ دكهت، ههروهسا دهنگێ بنهمالێن شههیدان بهس بیت، وان ناپاك و خاك فرۆشان ب سزایێ ڕاستهقینه بگههینیت، ههر چهنده ئهز ب گۆمانم، ژبهر كو ل وێ زوونێ چو پیرۆزى و بههایهك نهمایه نههاتبێته بهزاندن، چونكو چو هێز نهمایه ئهو ژێ ب ترسن و ئهوان رابوهستینیت، ههروهكو هۆزانڤانێ مهزنێ كورد “حاجى قادرێ كوى” دبێژیت” بهخامه و شیر دهولهت پایهداره…. خامهم ههیه و شیـر نادیاره”، ئهڤه ژى دهبرینێ ژ وێ ڕاستیێ دكهت كو “شیر”، ئانكو ئهو هێز یاكو دهولهت خوه ل سهر ڕادگرت و دهێته پاراستن و ناپاك ترسێ ژێ دكهن، نه ههر نه دیاره، بهلكو ل كوردستانێ ب درێژاهیا دیرۆكێ ههر نهبوویه، لهو ب ئاشكرایى ناپاكى دهێتهكرن و ئاخا كوردستانێ دهێته فرۆشتن و شانازى ژى ب وێ ناپاكیێ دهێتهكرن، ئێدى عاقیبهت… ههما ب خێر بیت.
