بانگهشا ههلبژارتنا ل ههرێمێ زوو دهستپیكر!!
بهدرخان زاویتهیى
(كۆم كۆم وهكو حهجێ چوونه دهف عهبادى داكو سزایان ل سهر ههرێمێ توند بكهت و مووچه و بۆدجێ رهوانهنهكهت)
خۆیایه ل عیراقێ ب گشتى و ل ههرێما كوردستانێ ب تایبهتى پشتى روخیانا رژێما بهعس ههردهمى رۆژا ههلبژارتنا هاتیه دیاركرن ههر وێ رۆژێ لایهنێن سیاسى دهست ب بانگهشێ دكهن و پێ ل ههمى قانوونا دانن و پهنایێ بۆ ههر تشتهكى دبهن و دهستێ خوه د ئێخنه ناڤ ههمى پیلانان، نهك بۆ بدهستڤهئینانا دهنگان ب تنێ، بهلكو بۆ شكاندن و لاوازكرنا لایهنێن بهرامبهر و مخابن ژ بهر زۆریا ئهجیندهیێن دهرهكى و دهستێوهردانا وان د ههلبژارتنان دا، نه قانوون دئێته جێبهجێكرن و نه كهس دئێته سزادان و ههر ئهڤه بوویه ئهگهر كو هندهك لایهن بێ ترس ههر چ پیلانا ههیى دگیرن و ئهڤا ل كوردستانێ روودهت ههر ڤهریژا ڤێ چهندێ یه كو چهندین ساله كوردستان تووشبوویێ.
د دو ههلكهفتێن جودا دا سهرۆكێ حوكمهتا ههرێما كوردستانێ خۆیاكر كو ل دهمهكێ نێزیك دێ سیستهمێ مووچا ئیته راستڤهكرن و ئابوورا ههرێمێ دێ گهشهكهت پشتى تووشى چهندین كێشه و قهیرانان بووى و ئهڤ چهنده ل ئیڤارا 20/3/2018 وهك پیرۆزباهیا جهژنا نهوروزێ و مژده بۆ ههڤوهلاتیان هاته راگههاندن ب رێیا پهیامهكا ڤیدیۆى ل دووڤدا لایهنێن سیاسى ئوپوزسیۆنا بهرێ (كۆمهله و گۆڕان و یهكگرتوو) ل گهل ههڤپهیمانیا بهرههم سالحى و نهوهى نوێیا شاسوار عهبدولواحد، ئهوان باش دزانى كو ئێدى ئهو بههانه ژى بۆ وان نامینیت كو خوه بینن خودانێن كێشان، خهلكى و ههر ئیكسهر ل راگههاندنا خوه ل دژى رێكهفتنا دهسپێكى ئهوا د ناڤبهرا ههولێر و بهغدا هاتیه كرن راوستیان و راستیا وێ ل بهر خهلكى بهرزهكر و پشتى ب هنهڤدانا نهورۆزێ بدووماهیك هاتى، دیسا ههولدان ل سهر كیستێ داخوازیێن مامۆستا و لاوازیا بارێ خهلكى پیلانێن خوه یێن سیاسى جێبهجێ كهن و زۆرهك ژ كادر و بهرپرس و ئهندام پهرلهمانێن وان چوونه دناڤ خۆنیشادانا دا و ههولێن تێكدانێ دان د ناڤ خونیشاندانان دا و ل راگههاندنێن ههر چ یاخراب ههیه ل ههمبهرى حوكمهتێ بهلاڤكر و راستیا داخوازیێن رهوا یێن مامۆستا بۆ پرسێن سیاسى و حزبى گوهارت و ههولدان كو ئهو پرۆژێ حوكمهتێ ههیى و ل بهره راگههینیت بكهنه دهستكهفت بۆ خوه و ژ بهر ئیفلاسا خوه یا سیاسى بانگهشێ بخوه پێبكهن ل ههوا ههلبژارتنان ئهو بوو ل پرێس كۆنفرانسێ رۆژا 28/3/2018 سهرۆكێ حوكمهتێ بهرنامه و پلانا حوكمهتێ سهبارهت مووچهیى و بارێ ئابوورى و چاكسازیان ب ههمى وهردهكاریڤه راگههاند و بۆ خهلكى رۆنكر كو ئهو بهردهوام یێ كاردكهن بۆ باشترلیكرنا بارێ ژیانا خهلكێ كوردستانێ و سوپاسیا خۆراگرى و سهبركیشانا وانكر ل سهر ڤان ههمى قهیرانان و ئهو كارته ژى ژ دهستێن وان لایهنان ئینا دهرێ ئهڤه ژ لایهكیڤه، ژ لایهكێ دیڤه ئهڤا ڤان رۆژان رویدایى شهڕێ بدهستڤهئینانا دهنگان و خوهژێكسافیكرنا ڤان لایهنان بوو گۆران ل دژى شاسوارى و بهرههم سالحى و كۆمهلێ دژى یهكگرتو و بهرههمێ دژى گۆڕان و ئێكهتیێ و یهكگرتو بۆ بهرهڤانیكرن ژ دهنگێن خوه و گرۆپێ خیانهتكار د ناڤ ئێكهتیێ دا ههولدان ئاگرێ ڤى شهڕى خۆشكهن داكو خیانهنهتا خوه ژ بیرا خهلكى بهن كو خهلكهكى ب دروستى نه دزانى چ روودهت و ل دووماهیێ ئهڤ لایهنه ههمى تووشى شكهستن و شهرمزاریهكا مهزن بوون ل بهرامبهر خهلكێ كوردستانێ.
فهره خهلك بزانیت كو زۆربهیا كیشه و قهیرانێن ههریمێ ههر ئهڤ لایهنێن سیاسى بوون !!! ل دهمهكى ههرێم ل سالا 2011 پشتر ریكهفتنا ئهربیلێ و دروستبوونا حوكمهتا عیراقێ ل گۆپیتكا هێزا خوه بۆ بهرامبهر بهغدا و چ كیشه نهبوون ئهڤان لایهنان خۆنیشاندانێن 17 شواتێ رێخستن و ب درووشمێن بێ بنهما خهلك خاپاند و داخوازا ههلوهشاندنا حوكمهتێ كر كو ل وى دهمى بهرههم سالح سهرۆك وهزیرانێ حوكمهتا ههریمێ بوو و نوكه بهحسه دادپهروهریێ و چاكسازیێ دكهت و ههرێم تووشى كیشه و قهیرانا سیاسى كر؟! ل دهستپێكا سالا 2014 ب بریارا مالیكى مووچه و بۆدجه ل سهر پیشنیازا بالێ خیانهتكارێ ئێكهتیێ هاته برین و ل دووڤدا مالكى سهرهدانا پاریزگهها سلێمانیێ كر و ئهوین نوكه بایكۆت و خۆنیشادانان دكهن، كهس دژى وى نههاته سهرجادا و خۆنیشادان نهكرن! ل ههیڤا ههشت سالا 2014 شهرێ داعش ل سهر ههرێمێ هاته سهپاندن و رێژهكا زۆرا خهلكى ژ ناڤهراست و رۆژئاڤا عیراقێ ئاوارهیى ههرێمێ بوون ئهڤه زیدهبارى ئاوارێن كوردستانا سووریێ و دهڤهرێن مادێ 140 چو لایهنهك بهرههڤ نهبوو پشتهڤانیا حوكمهتێ بكهت د وان كاودانێن سهخت دا، بهلكو پیلان گیران و پێشمهرگه ب ملیشیا و شهكهستى پێناسهكر! ل سالا 2015 پێشمهرگه زالبوو ل سهر بهرۆكین شهڕى دژى داعش و تووشى شكهستنێن مهزن كر و ههڤپهیمانیا نیڤدهولهتى بۆ پشتهڤانیا پێشمهرگهیى و حوكمهتا ههریمێ سهربخوهیا ئابوورى راگههاند ل دهمهكى كوردستان دا زال بیت ل سهر قهیرانان، ههر دیسا ڤان لایهنان ب بههانهیا پۆستێ سهرۆكاتیا ههرێمێ بوونه ئێك سهنگهر ل دژى پارتى و ههولدان د وان كاودانێن سهخت و دژوار دا كۆدهتایێ ل سهر پارتى بكهن ب رێیا پهرلهمانى و ههرێمێ رادهستى دوژمنان بكهن و پشتى شكهستن ئینایى د پیلانا خوه دا خهلك ب درووشمێن بریقهدار ئینا سهر جادان و بارهگا و رێڤهبهرى سۆتن و خهلك دا كوشتن و قهیران قولتر لێكرن، ئهڤه ل دهمهكى بوو كو ئهو لایهن ژى پشكدارى حوكمهتێ ببوون. ل دهستپێكا سالا 2017 شهرێ داعش بهر ب دووماهیێ چوو و پلانا حوكمهتا ههرێمێ ئهوبوو ب داهاتێ ههرێمێ و ناڤچهیێن دهرڤهیى ئیدارا ههریمێ بارێ ئابوورى یێ كوردستانێ پێشبێخیت و سیستهمێ مووچهیان بێته راستڤهكرن و باشتر لێكرن و سهرهرایى ههمى گڤاشتنان و پیلانگیریا و دژایتكرنا بهغدا سهركردایهتیا كوردى بریارا ریفراندۆمێ دا و زۆربهیا ڤان لایهنان ب ههمى رهنگان دژ راوستیان، لێ ههر سهركهفتیانه هاته ئهنجامدان و چو بهانهیهك بۆ ڤان لایهنان نههێلا كو دژى ئاواتێن خهلكێ كوردستانێ راوستن، لێ دیسا مهزنترین خیانهت دژى كورستانێ ئهنجام دا و كهركووك و زۆربهیا ناڤچهیێن كوردستانى یێن دهرڤهیى ئیدارا ههریمێ رادهستى حهشدا شهعبى كرن و ههولا داگیركرنا ئهربیلێ دا و د داستانێن بێ وێنه دا ل پردێ و سحیلا، پێشمهرگهیى حهشدا شیعى تووشى شكهستنێن ئێكجار مهزن كر. لێ ههر ئهڤ لایهنه نهراوستیان و ههولدان حوكمهتا ههرێمێ بههلوهشینن ب رێیا رێگرتن ل پاشخستنا ههلبژارتنان ل پهرلهمانى كو بریاربوو ل 1/11/2017 بێنه ئهنجامدان و ب رێیا رێگرتنێ ل دابهشكرنا دهستههلاتن سهرۆكێ ههرێمێ كو سهرۆك بارزانى نامه بۆ پهرلهمانى هنارت بوو و دهست ژ پۆستێ سهرۆكاتیێ بهردا، لێ ههردو پیلانا ههر شكهستن ئینا و ههردو قانوون هاتنه پهسهندكرن و دهربازكرن. د گۆپیتكا قهیرانان دا بوونه پشتهڤان بهغدا و كۆما سزایان ل سهر ههریمێ سهپاند و خو ژ حكومهتا ههرێمێ ڤهكیشا و بانگهشه بۆ حوكمهتا ئینقاز كر كو مهرهما وان ئهو بوو قهوارێ ههرێما كوردستانێ ژ نافببهن و ب بریارهكا سیاسى ئهنجامێ، ریفراندۆمێ ههلوهشینن د وێ پیلانێ ژی دا شكهستن ئینا. كۆم كۆم وهكو حهجێ چوونه دهف عهبادى داكو سزایان ل سهر ههرێمێ توند بكهت و رهفتارێ ل گهل نهكهت و مووچه و بۆدجێ نه رهوانهكهت و ئابلۆقا دبلۆماسى و سیاسى دژوارتر لێبكهت، لێ نهك ههر ئهڤ چهنده بدهستڤه نههات بهلكو تووشى شكهستنهكا مهزن بوون پشتى سهرۆكێ حوكمهتێ ئابلۆقا دبلۆماسى شكاندى و عهبادى نهچارى دانوستاندنان كرى و ل دووماهیێ رێكهفتنا دهستپێكى هاتیهكرن د ناڤبهرا ههولێر و بهغدا كو د چارچووڤێ دستووریدا كێشه بێنه چارهكرن. ئهڤه ئهو راستینه كو دڤێت خهلكێ لێ هشیار بیت و بزانیت كا پیلانێن ڤان لایهنان چنه و دژى كێنه.
ههر حزبهكا دى بال جهێ پارتى و ههر حوكمهتهكا دی با ل جهێ یا ههریمێ ههر قاوهریكێ دی با ل جهێ ههریما كوردستانێ و ئهڤ پیلانه ههمى و ب دریژیا ڤان سالان ههمیان ل دژى هاتبانه گێران و دهڤهر بخوه ههمى تووشى ڤان كارهساتان بووى و كوردستان ههر مایه ئارام و پاراستى. نوكه نهك هاتبوونه ههلوهشاند بهلكو ئاسهوارێن وێ ژى نهمابوون، لهورا دڤێت خهلكێ كوردستانێ ڤێ چهندێ باش بزانیت كو ئهگهر ئهڤ حوكمهته و پارتى نهبا نوكه كوردستان تووشى چ كارهسات كربوو ڤان لایهنان. لهورا ئهوا نوكه دئێته كرن ژ لایێ ڤان لایهنان ڤه ههر درێژهپێدهرا وان پیلانان یه و مهرهم ژى شكاندن و ههلوهشاندنا ههرێما كوردستانێ یه پشتى ههمى پیرۆزى و دیرۆك و دهستكهفتێن دۆزا كوردى د چاڤێ تاكێ كوردان شكاندین.
كاودان و ئالۆزیێن جیهانێ و دهڤهرێ وێ چهندێ خۆیا دكهن كو رۆژههلاتا ناڤین دێ تووشى شهرهكێ مهزن بیت و دێ ئێته دابهشكرن و ئهڤ پیلانێن دئێنه گێران ل دژى كوردستانێ ههولێن وهلاتێن ههرێمى و هندهك ئهجیندهیێن نیڤدهولهتینه و ب رێیا ڤان لایهنێن سیاسى كو نههێلن كورد مفایى ژ ڤان كاودانان ببینیت و نه گههیته ئارمانجێن خوه یێن نهتهوهیى لى ئهڤ ههمى ههول و پیلانه هاتینه ژناڤبرن و تێكشكاندن ههتا نوكه و دڤێت ئێدى خهلك هشیار بیت و نههێلیت ئهڤ لایهنه ڤێ دهلیڤێ شكهستێ وان ببهن و بهرهف ئاقارهكێ خراب ڤه ببهن و چارهنڤیسێ وان وهكى یێ سووریێ و عیراقێ و یهمهنێ و زۆر وهلاتێن دى لێبهكهن.
