بژیت كۆمارا عیراقا ئیرانی!
ئایدن عینایهت دۆسكی
بێگومان دێ سهرۆكێ وێ ژی بیته (بهرههم سولهیمانی) و بلا كهس نه بێژیت وهنینه. ئهڤه حوكمهت هاتهدانان ب واقعهكێ 20% ب تنێ ژ خهلكێ عیراقێ پشكداری تێدا كریه, و كی پشكدار بوو, پارتێن شیعی و هندهك مرۆڤێن خشیم, ئهم دێ هێینه وهزارهتهكا نا هێته پێكئینان، چونكو سێ دهولهتێن سهرهكی ئارمانجێن وان تێدانه, دهولهتهكا جیران یا ب ناڤێ عهرهبان و سوننیان نهڤێت وهزیرێ ناڤخوهیی فلان كهس بیت, و دهولهتهكا دی یا جیران ب ناڤێ تائیفیهتێ دڤێت ئهو فلان كهسه ببیته وهزیر, ل گهل دهولهتهكا مهزن و زلهێز و ب هزارهها كیلۆمهتران ژ عیراقێ دوور, بالیۆزێ وێ فهرمانێن خوه ئهوێن ل دووڤ ئارمانجێن خوه یێ ل سهر عیراقێ دسهپینیت, ئیران ب رێیا (بهغدا ، سووریا، لبنان) بهرفرهه كر ب هێجهتا كو شهرێ ئیسرائیل بكهت, بهلێ ئهڤ تشته بهرچاڤ نینه، چونكو ئیسرائیل گورزێن مهزن د ئیرانێ وهردكهت ب رێیا تێشكێن وێ و دبینیت ل (غهزه) هندهك مۆشهكێن لاواز یێن ئیرانێ د ئیسرائیل وهردكهت, بهلێ یان ب دهوروبهرێن گوندێن ئیسرائیل دكهڤن یان ب رێڤه دپهقن یان ژی مهتالهكێ ئیسرائیلی وان مۆشهكان دئێخن. ئاریشه ل ڤێره خوه دخاپینن و تلیلیا ڤهددهن و دبێژن ئهم سهركهفتی نه.
ل سووریا ب ههموو میلیشیاتێن خوه یێن جۆراوجۆر یێن شیعی ئیران نهشێت خوه فیشهكهكێ د ئیسرائیل وهركهت. ل لوبنان ب رێیا (حزب الله) یێ گازی دكهن ئهم دێ وانێن خراب نیشا ئیسرائیل دهین و ئهم دێ ئیسرائیل سۆژین, ب تنێ لاڤ لاڤه و ئاخڤتنه. و ئیران ژی ب سهدان كیلۆمهتران ژ ئیسرائیل دووره و گهفێن ڤالا لێ دكهت, وهكی وێ مهتهلا كوردی ئهوا دبێژیت: (كتكا میرا ب حهفت زنجیرا بهردهمه ته)…..
عیراق ب درێژاهیا (1300) كم سنۆر ل گهل ئیرانێ ههیه, و ئهڤ سنۆره یێ بهردایه و ئیران دبێژیت ب فهخر و شانازی عیراق بۆ مه زڤری ڤه و عیراق خیشكا مه (نه برا) یا بچووكه و بۆچى وهناكهت!؟
100 ریبار ل عیراقێ برین, چهندین كهلوپهلێن لاواز و ئاهێن خوارنێ یێن هژمار (سفر) یێن گهماره و پیس بۆ عیراقێ دهرباز دكهن و كههرهب ژی لێ بری و چهندین جۆرێن ماددێن هۆشبهر و چهندین جۆرێن چهكێ بێ دهنگ بۆ عیراقێ دهرباز دكهن و تشتێ مهزن نهكو شیعاتیێ بكاردئینن، بهلكو شۆفینیا فارسان ل سهر عیراقێ دسهپینن. باشترین نموونه ئاڤا (شگ العرب) ژ بلی خێ یا دهریای چهندین دهرمان و پاشماوهیێن ماددێن كیمیاوی ئاڤ پیسكریه و ئاڤا ڤهخوارنێ ل بهسرا نهمایه, نموونهكا دی ئهگهر ههڤوهلاتیێ عیراقێ بهر ب ئیرانێ ڤه بچیت بۆ گهشتوگوزارێ یان سهرهدانا نۆشداری پێدڤیه 100$ وهك ڤیزه بدهته ئیرانێ, بهلێ دهمێ ئیرانی دهێنه زیارهتا ئیمامێن شیعا تشتهكێ كێم ددهنه عیراقێ ل گهل خوارنا وان و نڤستنا وان و رهحهتیا وان ل سهر حسێبا مهواكبێن عیراقێ ئانكو (نان و…..و ئیستیراحهت).
ههر وهسا سولهیمانی یێ بوویه روستهمێ زال و جاكی شانێ عیراقێ و ب دلێ خوه ئهڤی پهرلهمانتاری دئێخیت و پهرلهمانتارهكێ دی یان وهزیرهكێ دی سهردئێخیت. بۆ نموونه وهزیرێن ڤێ كابینێ ئێك بادهكێن دهستپاكی ل سهر ههنه و یێ دی دووڤچوونهك یا ل دووڤ ههی كو داعشه. ئیران عیراقێ ددانیت باخچهكا پشتێ و چ دڤێت ل عیراقێ دێ كهت, وێ دڤێت وهزیرێ ناڤخوهیی ههر ژ وان بیت دا پتر دهستههلات ل سهر حهشدێ و میلیشیاتێن شیعی ههبیت و دڤێت ب ملیاراتان دۆلاران فایدهكی ژ عیراقێ بكهت, و دێ هندهك نموونا بۆ ههوه بێژم وهك:
ل ڤێ دووماهیێ عیراقێ هندهك سپیاتیێن ئیرانێ رهتكر، چونكو بهرههمێ شیرێ (گوه درێژ)ی بوون, و ب ڤێ چهندێ ههڤالهكێ مه یێ نێزیك دگۆت “لهوا جهمێ من ئهو بهرههمه دخوار بركا من وهكی دهنگێ وی جامێری (گوه درێژ) دهێت”.
برادهرهكێ دی ل (دیالا) بۆ خوه كارگهههكا سپیاتیێ ڤهكر، بهلێ گرۆپێن میلیشیاتێن شیعی هاتنێ و گۆتنێ “تو دزانی ئهم بهرههمێ سپیاتیێ ژ ئیران د ئینین رامانا وێ چیه تو ڤێ كارگههێ ڤهدكهی, یان بگره یان دێ سۆژین”.
هندهك كریارێن دهێنه كرن ل عیراقێ وهك ههبوونا گرێن گلێشی، بێكاری، دهستدرێژی ل سهر زارۆیان…هتد, ئهڤه ههموونه بهرههمێ شیعاتیێ یه بهلێ بهرههمێ شۆفینیێ یه و تشتێ گهلهك سهیر ڤێ دووماهیێ ل عیراقێ پهیدا بوو وهكی یاریكهرێ تهپاپێ یێ گهنج ب ناڤێ (قوسهی مونیر) و ل سهر تۆرێن میدیایێ دبێژت “هندهك راهێنهر كارێن دهستدرێژیێ ژ مه دخوازن دا بهێلن ئهم بچینه تیمێن ئاست بلند”, پسیارا مه ل ڤێرێ ئهڤهیه كهنگی دێ كۆمارا عیراقا ئیرانی چاك بیت و بێ مایتێكرنا ویلایهتا فهقیهی دێ ب سلامهتی ژیت!؟
ئیران ژی یا كریه مهتهلا وان ههردو ههڤالان ئهوێن مریشكهك بۆ خوه كرین و 11 هێك كرن و دهمێ بووینه چیچهلۆك دڤیان بۆ خوه لێكڤهكهن, ههردو چوونه نك حهكیمهكی و گۆتنێ بۆ مه لێكڤهكه, حهكیمی ژی گۆت” ههر ئێك ژ ههوه 5 پێنچ چیچهلۆك بۆ ته و پێنچ چیچهلۆك بۆ ته و چیچهلۆكا مای ب ماك ڤه بۆ منه…!
ههموو كوتلێن سیاسی دبێژن سهرۆك وهزیر ئازاده بۆ ههلبژارتنا وهزیرێن خوه بهلێ ل پشت پهردێ ههمی پارتا باهرا خوه دڤێن, داخواز ژ خودێ دكهین حوكمهت پێكهبێت و كورد ههمبهرى دهركهڤن.
