گرنگیا كۆنگرێن نێڤدهولهتى
رهمهزان نهسردین كێڤلى
ل ناڤ یهكێن نیڤدهولهتى زۆر ئالاڤێن دى ههنه كاریگهریا خوه ل سهر دورستكرنا سیاسهتێن نیڤدهولهتى دكن، ژبلى دهولهتێ وهكو یهكهكا سهرهكى یا چڤاكى نێڤدهولهتى رێكخراوێن نێڤدولهتى ههنه رۆل و پێگههێ وان زۆرێ كارایه و دیسا گهلهك ژ ئهڤان رێكخراوان بریارێن وان د ملكهچن بۆ ههموو وهلاتێن جیهانێ ل گهل هندێ ژى ب دههان رێكخراوێن بچووكتر بۆ مهرمێن جودا جودا هاتینه دورستكرن چ یێن ههوارهاتنێ بن یان یێن چاڤدێریا مافێ مرۆڤى و پرسێن گرێدایێ پهنابهر و زارۆ… هتد.
لهورا ژى هژمارهكا كۆنگرێن جودا جودا دهێنه پهستن ب مهرمێن ژ ئێكجودا چ ئهو مهرهم سیاسى بن یانژى ئهمنى و ئابوورى و كهلتوورى, ئێك ژ وان كۆنگرێن گرنگ ئهڤرۆ ل سهر ئاستێ جیهانێ كۆنگرێ (میونشه) كو تایبهت ب كاروبارێن ئاسایشا جیهانێ و تێدا چهندین دیدار و كۆمبوون و ڤهكۆلین ل سهر بابهتێن ئاسایشا جیهانێ دهێنه بهحسكرن و گفتوگۆكرن، لهورا ب دیتنا مه گرنگیا ڤان كۆنگران ل چهند خالان دا یه ژ وان:
وهرگرتنا دیتنا زۆربهیێ وهلاتێن جیهانێ یه ل سهر بابهتێن ئاسایشێ، چونكو تیرۆر ئهڤرۆ ئێكه ژ مهزنترین گهف و مهترسیان ل سهر جڤاكێن نیڤدهولهتى و سهرهلدانا تیرۆرێ گرێدایێ چهندین هۆكارانه.
داریشتنا بهرنامه و پلانێن باشتر بۆ دورستكرنا سهقامگیریا ئهمنى بۆ هندێ ئاسایش دبیته بنهما بۆ گهشهسهندنا زۆربهیێ بیاڤێن دیێن ژیانا جڤاكێ نیڤدهولهتى.
چاڤ رۆنیا جڤاكێ نیڤدهولهتى بۆ داریشتن و دانانا سیاسهتا نێڤدهولهتى ههمبهر پرسێن ئاسایشێ.
پشتهڤانیكرن وهرگرتنا پێزانین و بابهتێن گرنگه گرێدایێ ئاسایشا وهلاتانه.
دورستبوونا ههڤكاریێ د ناڤبهرا یهكێن نیڤدهولهتى بۆ روى ب روى بوونا بابهتێن ئهمنى و داریشتنا میكانزمێن جێ بهجێ كرنێ نه ل سهر ئاستێن جودا.
دبیت خالێن زێدهتر ههبن گرنگیا ئهڤان كۆنگران دیار بكهن، چونكو ههر وهلاتهك ل چارچووڤێ بهرژوهندیێن خوه یێن سیاسى و ئهمنى مفایێ ژ ئهڤان جۆره كۆنگران وهردگرن، ئهگهر ئهم بێن پشكداربوونا شاندێن حوكمهتا ههرێما كوردستانێ ل قووناغێن بۆرى ئهم دێ گههنه وى ئهنجامى كو ههرێما كوردستانێ پشكهكێ كاریگهره بۆ دورستبوونا ئاشتى و ئاسایشا دهڤهرێ و ئهو بهرنامه و پێنگاڤێن ژ لایێ ههرێمێ ڤه هاتینه هاڤێتن ژ ئهڤى ئالى ڤه بۆ مه دیاردبیت جهێ بایهخ و گرنگیا جڤاكێ نێڤدهولهتى نه، لهورا پشكداربوونا ب هێز شاندنێن ههرێمێ ئهڤێ چهندێ دوپات دكن.
ل قووناغا بهرى نوكه رۆلێ بهرێز سهرۆك وهزیران ل سهر ئاستێ جیهانێ بۆ دورستكرنا ئاشتیێ كارا بوویه و قووناغا داهاتى ژى دێ كورد ب شێوهكێ ب هێزتر پشكدارى ڤێ پرۆسێ بن، لهورا بۆ مللهتێن وهكو مه كوردان ئهڤ كۆنگره دو هنده گرنگیا خوه ههنه، چونكو دبنه پرهك بۆ لێكگوهۆرینا بیرۆرا ل سهر پرسێن ل دهڤهرێ دورست دبن و ههروهسا پێگههێ ههرێمێ ژ لایێ سیاسى و ئهمنى ڤه بهێزتر لێ دكن.
لهورا گرنگه ههرێما كوردستانێ ئهڤان كۆنگران بخوه ب دهلیڤه بزانن بۆ وهبهرهینانێن سیاسى و ئهمنى بۆ هندێ ههر گهڤ و مهترسیهكا ل سهر ههرێمێ ههبیت نههێلن یا لاوازتر لێ بكهن و مفایێ ژ ههموو وان بهرنامه و پلان و میكانزم و پشتهڤانى و هاریكاریا بكهن یێن جڤاكێ نێڤدهولهتى پێشكێش دكهت و گرنگه كورد بشێن راستهوخوه هاریكاریا وهلاتێن زلهێز وهربگرن ل ئهڤان كۆنگران.
