ته كێڤریشك دڤێت.. ئهمریكا دێ مینیت
ته كێڤریشك دڤێت.. ئهمریكا دێ مینیت
ته غهزال دڤێت! ههر دێ ئهمریكا مینیت
ئایدن عینایهت
دبێژن دهمێ ترامپ سهرهدانا لهشكرێ خوه كری ل قاعیدا (عین الاسد), ڤیزا عیراقێ ژ لایێ قاسم سولهیمانی وهرگرت بوو و گۆته وهكیلێ وهزارهتا بهرهڤانیێ, نه چیه عیراقێ بێی ڤیزا سولهیمانی.
ئهمریكا ب هزاران كیلۆمهتران ب رێیا ئاڤێ و ئاسمانی هاته عیراقێ و سهدامێ گۆربهگۆر لادا, پسیار ئهڤهیه.. ئهرێ دێ ب سانههی عیراقێ هێلیت؟ و بۆچی دێ هێلیت؟…
بهرسڤ: ئیران چهنگێن خوه یێن لهشكری یێن شیعی (74) میلیشیات ل عیراقێ ئاڤاكرن و (34) میلیشیاتێن سوننی ل گهل (3) میلیشیاتێن كرستیان و (2) یێن توركمان و شهبهكا. ئهڤ میلیشیاته ئاڤاكرن ل عیراقێ بۆ دو ئهگهران, ئهگهرێ ئێكێ, تولا خوه ژ عیراقیان ڤهكهت ل شهرێ ههشت سالان و ئهگهرێ دووێ, دا بشێت كونترۆلهكا تهمام ل سهر ژیانا عیراقیان بكهت. لهوا رێك ڤهبوو ژ (دیالا) یا عیراقی حهتا دهریا سپی بۆ سووریا و لبنان و خالا ئهڤ رێكه دهركهڤیت بۆ سووریا لبنان دهڤهرا (تنف) یا ههڤپشك ل گهل عیراق ـ سووریا و ئوردن, ژبهر هندێ دهمێ دڤێت چهكی و تهقهمهنیێ و شهرڤانان فرێكهت، دێ د ڤێ رێیێ را فرێكهت و ناڤێ وێ بوویه (گریق الحریر الجدید).
لهوا ئهمریكا هاته د گۆرهپانێ دا و ئهگهر مرۆڤهكێ خشیم هزرا خوه بكهت ب ڤێ چهندێ دێ بێژیت ئهمریكا یا هاتیه د ئاخا عیراقێ دا ژ بهر گازێ, ئهم ههموو دزانین گازا عیراقێ و ب ساناهی دچیته ئهمریكا ب رێیا كۆمپانیێن ئیسرائیلی.
ئهڤه لایهكه, لایێ دی ئهمریكا ئهگهر ژ عیراقێ دهركهت و ئهڤ ئارمانجه یا شیعا یه, دێ چ روودهت؟
جارهك دێ شیعه رابنه سهر خوه و دێ سوننیا برینن, وهك مه دیت ل (رهمادی ـ مووسل و تكریت) و جارهك دی دێ هندهك گرێبهستا ل گهل هندهك خوهفرۆشان گرێدهته ڤه و ڤێ جارێ نه بهس دێ كهركووك ستینیت، رهنگه ههول بدهن تووشی ههرێمێ بن, و وان سهربۆرهك د ڤی واری دا ههیه, و لاڤهلاڤێن سیاسی یێن عیراقی بۆ عیراقی یان بمینن و بلا جارا ئێكێ لهشكرێ سووری ژ عیراقێ بدهرئێخن یان پهكهكا ژ شنگال دهربئێخن یان هێزێن ههڤپهیمانان دهربێخن.
ئهمریكا بێ شهرم و بێ ترس و ژ زاردهڤێ ترامپی دبێژن ئهم یێن ماین دا وێ رێیێ بگرین ئێك و چاڤدێریا ئیرانێ بكهین دو و نههێلین جهنگێن ئیرانێ درێژتر بن ل جیهانێ, كهواته جهنگێن وێ یێن گههشتینه سینگال ل ئهفریقیا.
بهروڤاژی ڤێ چهندێ ئهگهر عیراق بهێلیت لهشكرێ ئهمریكی دو ـ سێ قاعیدێن خوه ل عیراقێ بهڵاڤهكهن دێ وهكی ئهلمانیا یان جهێن دی ژیانا وێ دهڤهرێ خۆش كهن, ب رێیا ئینانا تهكنولۆژیایێ و پێدڤیێن ژیانێ یێن نوو و ئابووریا عیراقێ ب هێزتر لێبێت، بۆ نموونه وهكی فلپین لێ هێت پشتی جهنگێ دووێ یێ جیهانێ.
بهلێ ئیران فهرمانێن خوه دگههینته میلیشیاتێن خوه كو ئهمریكا نهمینیت د ناڤ عیراقێ دا و ئهگهر وان میلیشیاتان هێرش كره سهر لهشكرێ ئهمریكی دێ چ ل وان میلیشیاتان هێت؟
ئهرێ ئاڵایێن وان كهسك و رهش و وێنێن سهركردێن ئایینی بهرامبهر چهك و تهقهمهنی و تهكنولۆژیا نوو یا ئهمریكی دێ خوه راگرن؟
ئهمریكا پیته نه ب ئیران دكهت و نه ب عیراقێ دكهت و بێ ترس و شهرم یا خوه دسهپینیت ل دهڤهرێ.
گاندی دبێژیت: (چ خێر د وی مرۆڤی دا نینه ئهوێ نانێ وهلاتێ خوه دخۆت و هزرا وی ل دهولهتهكا دی بیت).
سیاسهتمهدارێن عیراقێ ژ ترسێن ئیرانێ دا یێ ههولددهن قانوونهكێ ژ پهرلهمانێ عیراقێ دهربێخیت كو چ هێزێن بیانی نه مینینن ل ناڤ ئاخا عیراقێ دا.
پرسا مهزن ئهڤهیه … قاعیده ژ لایهكی و پاشماوێن داعش ژ لایهكی ل گهل (رایات البیچاو) ئهگهر هێزهكا دی یا درندهتر نههێت و بكهڤنه د ناڤ عیراقیان دا, ئهرێ كهت و جۆتانێ پێ ناكهت؟. عیراق دڤێت یان نهڤێت ئهمریكا یا مای و دێ مینیت ههتا بهرژهوهندیێن خوه یێن كهسایهتی بدووماهی بینن، پاشى دێ عیراقێ هێلن.
سهرچاوێ مهتهلۆكێ: (ئهگهر ته كێڤریشك دڤێت, دێ كێڤریشكێ راكهی… و ئهگهر ته غهزال دڤێت, ههر دێ كێڤریشكێ راكهی…!)
