وهغهرا د. مورسی د تهڕازیا سۆشیال میدیا كوردی دا
ئیسماعیل عهلی
گهلهك جاران دبینین كو جڤاكێ كوردی ڕهفتار و بۆیهرێن سهرنجڕاكێش د خواندنا ڕوودانان دا ههنه، مینا ژ دهستدانا كهسایهتیهك ناڤدار كو دبیته ئهگهر هندهك وهڵاتیێن مه یێن كورد دبنه چالاكڤانێن تۆڕێن جڤاكی، تایبهت یا فهیسبۆكی، بهلێ ب سهرهدهریهكا شاش و تێدا خهلكێ مه دبیته دو جین یان دو گڕۆپ ب دژایهتیهكا توند كو تاكهكهسێ كورد ل ههمبهر ئێك وهكو كێر و پهنیری لێ دهێن، زمانێ ناڤزڕاندنێ و شكاندنا دژی ئێك بكاردینن، ڕێزێ ل ههست و نهست و سۆزێن ئێك ناگرن، قهسێن بێ ڕهوشت لههڤدو ڤهدگێڕن، سڤكاتیێ ب كهسایهتیا ههڤ ئێك دكهن، حهتا دگههیته زمانێ توندی و خوهڕاكێشان و لئێك تۆڵڤهكرنێ. د ڤان ڕۆژێن بۆری دا ڕوودانا مرنا دكتۆر موحهمهد مورسی ببوو مانشێتێ ئێكێ و حهتا نوكه ژی هندهك ژێ بهردهوامه، دنێڤبهرا حهزژێكهرێن وی و ههڤدژێن وی. ئهم دزانین سهرۆكێ بهرێ یێ میسرێ موحهمهد مورسی ل سالا ۲۰۱۲ ب پڕۆسێسا هلبژارتنان و ئینانا ٥۲ ژ سهدێ ژ دهنگا گههشته سهرۆكاتیا دهسههڵاتێ كو مافێ چار ساڵێن حوكمڕانیێ ههبوو، كهسێ ئێكێ بوو ژ ئیخوان مسلمین سهر ب پارتا داد و گهشهپێدانێ بگههیته سهر كورسیا سهرۆكاتیێ. بهلێ پشتی ب تنێ ساڵهكێ كۆدهتایا لهشكری ب پیلانا عبدولفهتتاح سیسی بهاریكاریا خوهپیشاندانێن خهلكهكی ل جاددهیا میسری دژی وی هاتهكرن و بو شهش ساڵا و ههتا رۆژا دووماهیێ ژ گیانێ وی ما ل پشت شفشێن زیندانێ. ل ڤێره ئهگهر ل دووڤ پیڤهرێن دهنگدان و هلبژارتنا بیت، بێگومان بدووماهی ئینانا وی ب وی ڕهنگێ نهچاڤهڕێكری دژی پتریا پیڤهر و پڕهنسیبێن دیمۆكراسیهتێ بوو، لێ ب دڵنیاڤه دیمۆكراسیهت ژی پێدڤی دیبلۆماسیهتێ یه، و دیار بوو كو ئیخوان ژ سهربۆڕێن دیبلوماسیهتێ د دوورن و ههر وهكو ل سهر وێ ئایدیۆڵۆژیهتێ ماینه ههر ژ ڕۆژا ئهو ل سهر هاتینه ئاڤا و پهیڕهوكرن. لهو مورسی ههر ئێكسهر گۆتارا توندوتیژ ل جهێ دانوستاندنا دیبلوماسی یا نهرم بكارئینا، ژ ڕۆژێن ئێكێ پێكۆڵكرن بۆ ئیسلامكرنا دامودهزگههێن حوكمهتێ و هه روهسا گۆهۆڕینا قانوونێن مهدهنی بۆ یێن ئیسلامی، گۆتار و خیتابێن دوژوار و ب ڕهنگ تۆڵڤهكرنێ خواندن كو ئهوی شیانێن ههین غهززه ژ دهستێن جوهیا بكێشیته دهوروبهرێن ئهلمهقدس بۆ موسلمانان بڤهگهڕینیت، كو ئهڤ سیاسهته ژی چ یا ڕاست بیت یان نه، ههڤڕكه ل گهل ههمی پیڤهر و پڕۆتۆكۆلێن نێڤدهولی یێن ساڵێن درێژ و وهلاتێ میسرێ ل گهل وهلاتێن ڕۆژئاڤا ههی. ب ههر حالێ بیت، درست بیت یان شاش بیت، روودانهك سیاسی و لهشكری یا ناڤخوهیا مسرێ بوو و بۆری، لێ خهلكهكێ مه ب سهرهدهریهكا ساوێلكهیی وهریسێ سێدارێ ل دۆر گهردهنا خوه ئاڵاندن یان ڕۆندك باراندن، ههڤدژیهكا مهزن مخابن د ناڤ تاكهكهسێن كورد بۆ ئێكتر ژ دایكبوو، كو ئهڤ زهبر و زهنگی و ناڤزڕاندنه چ چاكی و خزمهتێ ناگههینته چارهنڤیسا گهلێ كورد، بهروڤاژی پتر برینێن كوردستانا پارچهكری كوور دكهت. مهبهست نه ئهوه كهسایهتیا خودێ ژێ ڕازی مورسی دژی كێشهیا مللهتێ كورد بوویه، نهخێر، ههر چ هڵویست نهبووینه، نه ب باشی و نه ب خرابی، گهلێ كورد ژی د ههمی دیرۆكێ دا چ ههلۆیستێن پشتهڤانیێ ژ لایێ ئیخوانان ڤه نهبوویه و نابیت ژی وهكو ههمی سهلهفیێن سوننه و ههروهسا شیعهیان و ههمی عهرهب و پرانیا وهڵاتێن ئیسلامی ژی. نۆڕماڵه هندهك ههڤخهمیا خوه ل ههمبهر سهرۆكێ بهرێ یێ میسری دیار كهن مینا ههر كهسایهتیهكا دی یا بیانی و ل ههمی جیهانێ ههیه، لێ ژلایێ لۆژیكی، نه یا بهرئاقله تاكهكهسێ كورد كو د كاودانهكی دا پێدڤی ژ ههمی تاكهكهسێن جیهانێ یێ نهتهوه پهڕێز و ناشیۆناڵیستی تر بیت ژبهر نهبوونا وهڵاتهكێ ئێكگرتی و دژایهتیا وهڵاتێن عهرهبی بۆ گهلێ كوردستانێ د دیرۆكهكا كهڤن دا، ژ نوو بۆ من ئهڤ تاكهكهسێ كورد زێدهپێڤهنانێ د ههڤخهمیا خوه دا بۆ كهسایهتیهكا ئیخوانی بكهت، ههمی ناڤونیشان و درووشمێن وی بكهته پڕۆفایلێ خوه د تۆڕێن جڤاكی دا، ڤیدیۆێن گۆتارێن وی ل سهر پهیجێن خوه بڕێز كهت، بۆ كهسهك بیانی و چ مفا نهگههاندبیته مللهتێ كورد. هێشتا دوورتر، ل بهرامبهر ڤێ ژی، ناڤزڕاند و شكاندنا كهسایهتیێن دیرۆكیێن كورد بكهت كو خزمهتا گهل و نهتهوهیێ كورد كربن، ل سهر حسێبا كهسایهتیهكا عهرهب. ههرچهنده ئهوێن ئهڤ بابهته زێده تۆخ كرین، گهلهك ژ وان د سهر پشتهڤانی و ههڤخهمیا خوهدا چ پێزانین نه ل سهر دیرۆكا ئێخوانیان ههنه و نه چ ژ كهسایهتیا د. مورسی دزانن. لێ دڤێت د ڕاستگۆ بین، ئهو تاكهكهسێن مه یێن كورد ب دژی ڤان پشتهڤانێن مورسی و ئێخوانان ژی، ژ شاشیێن وان د سهرهدهریكرنێ دا كێمتر نینن و ههر ئهو زمانێ ناڤزڕاندنێ دژی مورسی و پشتهڤانێن وی بكارئیناینه، و ئهو زۆڕداریا ژ لایێ لهشكرێ میسری ڤه بۆ ئێخستنا وی ژی هاتیهكرن ب ڕاست و دورست دبینن، یان تومهتبار دكهن كهسهك دژی نهتهوهیێ كورد بێی چ بهلگه و ڕاستی بو ووێ تۆمهتێ ههبن. یا فهره مللهتێ مه، تایبهت گهنج بزانن، ههیه فهر و ههیه فهرتر، لێ مخابن ئهو گهرمه بابهتێن ل سهر لاپهڕێن ئهلیكتڕۆنی یێن تۆڕێن جڤاكی دبینین، نه ب تنێ فهرتر نینن، لێ پتریا وان د فهر ژی نینن، ژبلی هزر و خواندن و تێروانینێن بهرتهنگ و پاشكهفتی نه، دووری بهڕژهوهندیا چارهنڤیسێ گهلێ خوهیی كوردن. بۆ ڕیزكرنا پهیڤێن دووماهیێ، مهبهستا من ئهو نینه پشتا لایهكی بگرم و یێ دی نه، ههردو لایێن تهڕازیا تۆڕێن جڤاكی شاشیێن خوه ههنه، لێ مهبهست وهرگرتنا وانه و عیبرهتانه ژ ڤان بۆیهرێن سیاسی و سهرهدریكرنهكا ههڤچهرخ و ڕیالیزمی دنێڤبهرا دو لایهنێن ههڤدژ د هزر و بیران دا و ئێك ئاڕاسته د ههستێن مرۆڤایهتیێ دایه و چاوانیا قهبوولكرنا ڕا و ڕا یا بهرامبهره. دڤێت جحێلێ كورد وهختێ خوه ب هزر و ئایدیۆڵۆژیێن بهرتهنگ و چهپڕهو و ڕادیكالی نه كۆژیت و دوور بیت ژ زمانێ جاددێ یێ زڤر و گیانێ ناڤچاڤسۆركرنێ و تۆڵڤهكرنێ، بهروڤاژی، كهسهك گیانسڤك و شرین بیت، ههردم دگهل شارستانیهت و ئاڤاكرنا مللهتان و پاراستنا مافێن مرۆڤایهتی و پشتهڤانێن گهلێن بندهست بیت، ب وهرگرتنا ڕا و هزر و بیرێن كهسێ بهرامبهری خوه ب گیانێ براینی.
