ئه‌تله‌تیكو نه به‌رشه‌لونایە هه‌تا ژ لێڤه‌رپوول بترسیت !
ئه‌ڤرۆ نیوز، زنار:
راهێنه‌رێ یانا ئه‌تله‌تیكو مه‌درید یا ئسپانى دیێگو سیمیونى ئه‌ڤرۆ رۆژا چارشەمبى ١١-٣-٢٠٢٠ دێ كه‌ڤیته د تاقیكرنه‌كا ب زه‌حمه‌ت دا هه‌مبه‌ر هه‌لگرا ناسناڤێ وه‌رزێ بورى یا قاره‌مانیا ئوروپا قاره‌مانێن خولان ده‌مێ دبیته مێڤانا یانا لێڤه‌رپوول ئنگلیزى ل یاریگه‌ها ئه‌نفێلد رود ژ یاریێن قوناغا شازدێ یا چامپیونزلیگێ.
ل یاریا چونێ دا یانا ئه‌تله‌تیكو د به‌رژه‌وه‌ندیا خوه دا ئێكلاكر ب گۆله‌كێ بێ به‌رامبه‌ر و دهێته چاڤه‌رێ كرن ئه‌ڤ شه‌ڤه یاریكه‌كا بهێز بیت ناڤبه‌را هه‌ردو یانا دا و دڤێت ئه‌تله‌تیكو و راهێنه‌رێ وێ سیمیونى د هوشداریا خوه وه‌رگرن ژ مه‌ترسیا ڤێ یاریێ.
به‌رشه‌لونا ل وه‌رزێ بورى ل هه‌مبه‌ر ڤێ یانێ تووشى ریمونتدایه‌كێ بوو ب چار گۆلان بێ به‌رامبه‌ر خوساره‌ت بوو ده‌مێ هه‌موو كه‌سان هزركرى سه‌ركه‌فتنا به‌رشه‌لونا ل یاریا ئێكێ ب سێ گۆلان بێ به‌رامبه‌ر ده‌ربازبوونا وێ مسوگه‌ر بوویه بۆ یاریا دووماهیا ڤێ قاره‌مانیا وه‌رزێ بورى لێ یانا رێدز ب سه‌ركێشیا یورگن كلوب ئاخفتنه‌كا دى هه‌بوو و شیان ب ریمونتادایێ یانا كه‌تالونى فرێكه‌نه مال، ئه‌ڤ بیرهاتنه دیده‌ڤانه بۆ سیمیونى و یاریزانێن ئه‌تله‌تیكو كو ب هوشدارى یاریێ بكه‌ن راسته شێوازێ یاریا یانا مه‌دریدى زێده‌تر به‌رگریه لێ وان ژى خوه ئاماده كریه ب چ شێوه سه‌ره‌ده‌ریێ دگه‌ل یانا ئنگلیزى بكه‌ن داكو تووشى چو ئه‌نجامێن نه‌چاڤه‌رێ كرى نه‌بن.
باشترین ده‌لیڤه به‌رامبه‌ر راهێنه‌رێ یانا ئه‌تله‌تیكو مه‌درید دیێگو سیمیونى یه هه‌بوونا خوه دوباره ب سه‌پینت پشتى زنجیره‌یه‌كا ئه‌نجامێن خراب د لالیگایێ دا بده‌ستڤه ئیناین و ئه‌ڤ قاره‌مانیه باشترین پێگوهۆره بۆ وى قه‌ره‌بوو بكه‌ت تایبه‌ت پشتى یاریا بورى د به‌رژه‌وه‌ندیا خوه دا ب گۆله‌كا بێ به‌رامبه‌ر ئێكلا كرى، دیسان نوكه باشترین ده‌لیڤه‌یه بۆ یانا روخى بلانكوس ژ به‌ركو ئه‌نجامێن یانا لێڤه‌رپوول ل ماوێ بورى د جێگر نینن و دبیت بۆ خوه ڤێ چه‌ندێ ب ده‌لیڤه وه‌رگریت و ئه‌ڤ چه‌نده یا دوور نینه ژ به‌ركو یانا ئه‌تله‌تیكو ب سه‌رپه‌رشتیا سیمیونى ل سالێن بورى دو جاران شیابوو بگه‌هیته یاریا دووماهیا چامپیونزلیگێ و نێزیكى ده‌ستڤه‌ئینانا ناسناڤى بوو لێ هه‌ردو جاران ل سه‌ر ده‌ستێ وه‌لاتیا خوه ریال مه‌درید تووشى خوساره‌تیێ ببوو.