شه‌هیان ته‌حسین: من هه‌موو هێز و گه‌نجاتیا خوه دایه راگه‌هاندنێ
دهۆك، هه‌رهین محه‌مه‌د:
شه‌هیان ته‌حسین، بێژه‌ر و پێشكێشكار ل كه‌نالێ رووداو، د دیداره‌كێ دا بۆ رۆژناما ئه‌ڤرۆ گۆت: راگه‌هاندنێ گه‌له‌ك ل من زێده‌كریه و زێده‌تر ئه‌ز ئاڤا كریمه وه‌كو كه‌سایه‌تی و تێگه‌هشتم و پتر ژیر بووم و هێدی هێدی د دونیایێ گه‌هشتم و ژزارۆكینی د راگه‌هاندنێ دابووم و ژ هه‌موو تێگه‌هشتنا خوه یا كو مرۆڤ دناڤ خه‌لكی دا فێر دبیت ئه‌ز دناڤ راگه‌هاندنێ دا فێربووم و ئه‌ڤه پێنگاڤا ئێكێ بوو ل كه‌سایه‌تیا من زێده‌كری، ژبلی حه‌زژێكرنا خه‌لكی و به‌رنیاس بوون و ئه‌ڤ تام و ئه‌كشنه دا ژیانا من و من ژی هه‌موو هێز و ده‌م و گه‌نجاتیا خوه دایه راگه‌هاندنێ و دبینم نه یا په‌شێمانم و ئه‌و رێكه‌فتنا دناڤبه‌را من و راگه‌هاندنێ دا یا سه‌ركه‌فتی بوو.
د دووڤدا گۆت: ل ده‌ستپێكێ ل ژیێ یازده سالیێ ل ده‌مێ من ل كوردستان تیڤی كاركری نه من ئاگه‌ه ژ به‌رنیاس بوونێ و نه پاره‌ی هه‌بوو و هه‌تا نوكه ژی من ئاگه‌ه ژ وێ چه‌ندێ نینه و بۆ هندێ كارناكه‌م و چوونا من ژ كه‌ناله‌كی بۆ كه‌ناله‌كێ دی و ل هه‌موو جهان وه‌سایه مرۆڤ جهێ خوه دگوهۆریت و گوهۆرینا جهێ مرۆڤی چ گرێدان ب پاره‌ی و به‌رنیاس بوونێ ڤه نینه، بتنێ هیڤیێن مرۆڤی زێده‌ترن ده‌مێ مرۆڤ دچیته جهه‌كی و دێ هه‌ست پێكه‌ت جهه‌كی پتر ده‌لیڤه یێن هه‌ین له‌ورا ل رووداو پتر ده‌لیڤه هه‌یه و هێزا من پتر دیاردكه‌ت و ژبه‌ر پاره‌ی ئه‌ز ل رووداو نینم، به‌لكو كه‌ناله‌كه دشێم ب ئازادی و ده‌لیڤه یا دایه من وه‌كو میدیاكار لێ كاربكه‌م، و گه‌له‌ك كه‌س هه‌نه ژبه‌ر كارێ وان نوژداره، یان ماموستایه، یان میدیاكاره ده‌لیڤا هه‌ڤژینیێ بۆ وان هه‌یه پتر گه‌نج داخازا هه‌ڤژینیێ ژێ دكه‌ن.
