چاڤدێره‌ك: 26 لایه‌نێن سیاسی خوه ژ هه‌لبژارتنێن ئیراقێ ڤه‌كێشان
ئه‌ڤرۆ:
هژمارا لایه‌نێن سیاسی ئه‌وێن خوه ژ هه‌لبژارتنێن پێشوه‌خت یێن ئیراقێ ڤه‌كێشای به‌ر ب زێده‌بوونێ دچن، چاڤدێره‌كێ پرۆسا هه‌لبژارتنان ژی دبێژیت، ئه‌و خوه‌كێشان یا سیاسی یه نه‌كو قانوونی، دیاركر ژی كو خوه‌ڤه‌كێشانا لایه‌نێن سیاسی ژ هه‌لبژارتنان هیچ كاریگه‌ری ل سه‌ر پرۆسا هه‌لبژارتنان نابیت.
هۆگر چه‌تۆ، رێكخه‌رێ تۆرا (شه‌مس) بۆ چاڤدێریا هه‌لبژارتنان گۆت” هه‌تا نوكه 26 لایه‌نێن سیاسی خوه‌ڤه‌كێشانا خوه ژ هه‌لبژارتنێن داهاتی یێن ئیراقێ یا راگه‌هاندی و دێ پایكۆتا وێ پرۆسێ كه‌ن، به‌لێ ئه‌ڤه خوه‌ڤه‌كێشانا قانوونی نینه، به‌لكو زێده‌تر خوه‌ڤه‌كێشانه‌كا سیاسی یه ژبه‌ركو ل هه‌یڤا خزیرانا بۆری كۆمسیۆنا بلند یا هه‌لبژارتنان ل ئیراقێ ده‌مێ هه‌فتیه‌كێ ده‌لیڤه دابوو هه‌موو به‌ربژاران، یێ دخوازیت خوه ڤه‌كێشیت، به‌لێ د نوكه دا بابه‌تێ خوه‌ڤه‌كێشانێ تنێ ئه‌وه ئه‌و لایه‌ن پرۆپاگندا هه‌لبژارتنان بۆ خوه ناكه‌ن، ئه‌گه‌ر نه ژ روویێ قانوونی ڤه 21 هه‌ڤپه‌یمانی یێن هاتینه تۆماركرن و 109 پارتێن سیاسی دێ پشكداریێ د هه‌لبژارتنان دا كه‌ن، بۆ هه‌لبژارتنێن داهاتی ژی سێ هزار و 249 به‌ربژار یێن هه‌ین”.
هۆگری گۆت ژی” ژوان به‌ربژارێن هه‌لبژارتنان 953 د چارچۆڤێ هه‌ڤپه‌یمانیان دێ پشكداریێ د هه‌لبژارتنان دا كه‌ن، هه‌روه‌سا هزار و 501 به‌ربژار خوه ل سه‌ر لایه‌نێن سیاسی ڤه هه‌لبژارتیه و 789 به‌ربژار وه‌كو تاكه‌س د پشكدارن د پرۆسێ دا، هه‌روه‌سا ژ سه‌رجه‌مێ سێ هزار و 249 به‌ربژارێن هه‌لبژارتنێن پێشوه‌خت یێن جڤاتا نوونه‌ریچن ئیراقێ، 951 به‌ربژار ئافره‌تن، ئه‌و به‌ربژارێن پشتی ئه‌نجامدانا تیرۆپشكێ ناڤ و هژمارا هه‌ر به‌ربژاره‌كی دێ چیته سه‌ر پسۆلا ده‌نگدانێ، ئانكو ئه‌و به‌ربژار یان حزب خوه ڤه‌كێشیت یان خوه نه‌ڤه‌كێشیت ناڤێ وی دێ هه‌ر مینیت و تنێ دشێن پرۆپاگندا هه‌لبژارتنان نه‌كه‌ن، ئه‌گه‌ر نه هیچ كاریگه‌ری ل سه‌ر پرۆسا هه‌لبژارتنان نابیت”.
ل دۆر وێ چه‌ندێ هه‌كه بایكۆتا لایه‌نان به‌رده‌وام بیت، ئایا كاریگه‌ری ل سه‌ر پاشخستنا پرۆسا هه‌لبژارتنان نابیت، رۆهنكر” هه‌تا نوكه ئه‌وا دیار دێ هه‌لبژارتن د ده‌مێ خوه دا هێنه ئه‌نجامدان، ئه‌و لایه‌نێن دێ بایكۆتا هه‌لبژارتنان ژی كه‌ن، تنێ دێ كاریگه‌ریا وان ل سه‌ر رێژه‌یا پشكداریێ د هه‌لبژارتنان دا هه‌بیت و نابیته هۆكار بۆ په‌كخستنا پرۆسا هه‌لبژارتنان”.
