حامد نسری: پشكداریێ د زارڤه‌كرنان دا ناكه‌م
ئه‌ڤرۆ، رێوار محه‌مه‌د ره‌شید:
حامد نسری، ئه‌كته‌ره‌كێ پارێزگه‌ها دهۆكێ یه د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ ئاشكرا كر كو پشتی ل هه‌یاما بۆری وی پشكداری د درامایه‌كێ دا كری بناڤێ (تۆل) و بینه‌ره‌كێ باش ب خوه‌ڤه گرێدایی، نوكه مژوولی چو كارێن نوو یێن هونه‌ری نینه ژ به‌ر هنده‌ك كاودانێن تایبه‌ت ب ژیانا وی ڤه.
ناڤهاتی ئاماژه دا وێ چه‌ندێ كو د پلانا وی دا هه‌یه ل داهاتی پشكداریێ د چه‌ندین كارێن نوو یێن هونه‌ری دا بكه‌ت و بۆ ڤێ مه‌ره‌مێ ژی داخواز ژ لایێ چه‌ندین كه‌نالان ڤه ژ وی هاتیه‌كرن كو پشكداریێ د درامایان دا بكه‌ت و گۆت: “راسته د سالێن بۆری دا من وه‌كو ئه‌كته‌ر پشكداری د چه‌ندین پارچه زارڤه‌كرنێن بازرگانی دا كربوو، به‌لێ نوكه ئه‌ز په‌شێمانی هنده‌ك ژ وان كارێن خوه مه ژ به‌ر كو ئه‌و كار دگه‌ل ڤی سه‌رده‌می ناگۆنجان و گه‌له‌ك كێماسی تێدا هه‌نه، به‌لێ نوكه وه‌كو ئه‌كته‌ر من پتر رۆلێ خوه د درامایان دا دیتیه و هه‌كه درامایێن نوو به‌رده‌وام بهێنه چێكرن و داخواز ژ من بهێته‌كرن پشكداریێ تێدا بكه‌م، ئه‌ز چوجاران پشكداریێ د پارچه زارڤه‌كرنان دا ناكه‌م”.
ل دووماهیێ حامدی خویا كر كو هه‌ر ژ ده‌ستپێكا كارێ وی یێ ئه‌كته‌ریێ و هه‌تا نوكه وی حه‌ز ژ رۆلێن كۆمێدی نه‌كریه، ژ به‌ر كو ب دیتنا وی ئه‌و رۆل دگه‌ل كه‌سایه‌تیا وی ناگۆن و بتنێ حه‌ز ژ رۆلێن تراژیدی دكه‌ت.
