مژوولی تۆماركرنا دو سترانێن نوو یه
ئه‌ڤرۆ:
سترانبێژ بۆكان هه‌ورامی، خه‌لكێ ده‌ڤه‌را هه‌وره‌مانه ئاشكرا كر كو به‌ری پێنج سالان وی ده‌ست ب كارێ هونه‌ری كریه و هه‌ر ژ ده‌ستپێكا خوه یا كارێ ستران گۆتنێ و هه‌تا نوكه وی بتنێ سترانێن سترانبێژێن ناڤدار گۆتینه، به‌لێ ئه‌و نوكه مژوولی تۆماركرنا دو سترانایه كو ئه‌ڤ سترانه یێن وی ب خوه نه و دێ بنه به‌رهه‌مێ وی یێ تایبه‌ت و بۆ وشه گۆت: “ئه‌ز ب شێوه‌زارێن هه‌ورامی و سورانی گه‌له‌ك ب باشی سترانان دبێژم و ئه‌ز یێ ب هیڤی مه ل پاشه‌رۆژێ ب شێوه‌زارێ كرمانجی ژی به‌رهه‌مه‌كی تۆمار بكه‌م”.
ناڤهاتی ئاماژه دا وێ چه‌ندێ كو ئێك ژ تایبه‌تمه‌ندیێن ده‌ڤه‌را هه‌وره‌مان ئه‌وه كو هونه‌رێ وێ یێ بلند ب ره‌سه‌ناتیا خوه مایه و چو ستایلێن دی نه‌شێن تێكه‌لی ستایلێ ره‌سه‌نێ هونه‌رێ ده‌ڤه‌را هه‌وره‌مان ببن و گه‌له‌ك ژ هونه‌رمه‌ندێن ب شێوه‌زارێ سورانی سترانان دبێژن مفا ژ ده‌وله‌مه‌ندیا هونه‌رێ هه‌وره‌مان وه‌رگرتیه و گۆت: “هه‌تا نوكه من به‌هرا پتریا سترانان ب شێوه‌زارێ سورانی گۆتینه، ژ به‌ر كو ئه‌ز ل هه‌وره‌مان نه‌ژیایمه و كارتێكرنا چه‌ندین هونه‌رمه‌ندێن ب شێوه‌زارێ سورانی ستران دگۆتن ل سه‌ر من هه‌بوو”.
