ئه‌ڤ ساله فوكسا فلمه فیسته‌ڤالا دهۆك یا نێڤده‌وله‌تی دێ ل سه‌ر ئه‌فغانستانێ بیت
ئه‌ڤرۆ، نه‌وزاد هلۆری:
گه‌را (هه‌شت)ێ یا فلمه فیسته‌ڤالا دهۆك یا نێڤده‌وله‌تی یا نێزیك دبیت، دهێته چاڤه‌رێكرن كو فوكسا ئه‌ڤجاره ل سه‌ر سینه‌ما ئه‌فغانستانێ بیت ب تایبه‌تی پشتی كو ژلایێ تالیبانێ ڤه هاتیه گرتن و ده‌ستهه‌لاته‌كا نوو ده‌ستپێكری و د قووناغا گوهۆڕینێن بله‌ز دایه.
حه‌سه‌ن عارف، به‌رپرسێ راگه‌هاندنا فلمه فیسته‌ڤالا دهۆك یا نێڤده‌وله‌تی بۆ رۆژناما ئه‌ڤرۆ گۆت: “ب دلخوه‌شی ڤه بۆ حه‌ز ژێكه‌رێن هونه‌ری و خه‌لكێ پارێزگه‌ها دهۆكێ رادگه‌هینین كو دێ گه‌را (هه‌شت)ێ یا فلمه فیسته‌ڤالا دهۆك یا نێڤده‌وله‌تی هێته ئه‌نجام دان، ئه‌ڤجاره دێ فوكسا به‌رنامێن فیسته‌ڤالێ ژی ل سه‌ر سینه‌ما ئه‌فغانستانێ بیت و كومه‌كا فلمێن كلاسیك و سینه‌مایا سه‌رده‌م یا ئه‌فغانستانێ دێ پشكداربن و د ناڤ به‌رنامێن فیسته‌ڤالێ دا دێ هێنه نیشاندان ل گه‌ل ده‌نگێن لوكال و دیاسپورا و نێڤده‌وله‌تی”.
ناڤهاتی گۆت: “پانۆراما فلمێن فیسته‌ڤالێ دێ ره‌نگڤه‌دانا جڤاكی، سیاسی و هونه‌ری بیت و نوكه و بوری پێكڤه گرێده‌ت، ژ گرنگریتن تشتێ بالكێش د ناڤ فیسته‌ڤالێ دا ده‌رهێنه‌ر (سه‌دق به‌رماك) ژ وه‌لاتێ ئه‌فغانستانێ كو نوكه وه‌كو په‌نابه‌ر ل مه‌نفایێ ل پارێس یا وه‌لاتێ فه‌ره‌نسا دژیت دێ فلمێ خوه یێ بناڤ و ده‌نگ (ئوسامه) نیشا ده‌ت، دیسان فلمه‌كێ دی یێ كلاسیكی و بالكێش فلمێ (قه‌نده‌هاره) یێ ده‌هێنه‌ر موحسن مه‌خمالباف”.
به‌رپرسێ راگه‌هاندنا فلمه فیسته‌ڤالا دهۆك یا نێڤده‌وله‌تی گۆت: “زێده‌باری ده‌مێن دژوار ل هه‌رێما كوردستانێ و عیراقێ و ده‌ڤه‌رێ دبورن، به‌لێ بۆ مه یا گرنگه كو فلمسازێن ئه‌فغانستانێ مێهڤان بكه‌ین و فوكسا فلمه فیسته‌ڤالا دهۆك یا نێڤده‌وله‌تی بێخینه سه‌ر سینه‌ما وه‌لاتێ ئه‌فغانستێ كو نوكه ئه‌و وه‌لاته‌ك د قووناغه‌كا نوو یا گوهۆڕینێ دا دبوریت”.
ل دۆر داتا و ژڤانێ فلمه فیسته‌ڤالێ ژی ناڤبری گۆت: “هه‌تا نوكه چوو داتایێن پێدڤی ل سه‌ر فلمه فیسته‌ڤالا دهۆك یا نیڤده‌وله‌تی ل به‌ر ده‌ست نینن، به‌لێ ل نێزیك دێ د كۆنگره‌یه‌كێ رۆژنامه‌ڤانی دا هه‌موو هێنه راگه‌هاندن، فلمه فیسته‌ڤال ژی دێ ل رۆژا 11/11/2021ێ ده‌ست پێ كه‌ت و ل رۆژا 18/11/2021ێ دێ ب دووماهی هێت”.
