لوقمان رێكانی: نوكه پتریا هونه‌رمه‌ندان به‌رهه‌مێن خوه ل تورێن جڤاكی به‌لاڤ دكه‌ن
ئه‌ڤرۆ، ره‌مه‌زان هه‌رنی:
سترانبێژ لقمان رێكانی ، د دیداره‌كێ دا بۆ رۆژناما ئه‌ڤرۆ گۆت: ره‌وشا هونه‌ری وه‌ك به‌رێ نه‌مایه ژ به‌ر ڤان كاودانێن ب سه‌ر كوردستانێ دا هاتین، ده‌مێ به‌رێ مه سترانه‌ك دروست دكر راگه‌هاندنێ ب تایبه‌ت ته‌له‌فزیۆنان گرنگی ددا به‌رهه‌مێن هونه‌ری، به‌لێ نوكه به‌روڤاژی لێ هاتیه، هه‌كه سترانبێژه‌كی بڤێت به‌رهه‌مێ خوه ل ته‌له‌ڤزیۆنه‌كێ به‌لاڤ بكه‌ت پێدڤیه واسته هه‌بیت، به‌رێ من گه‌له‌ك كلیپ دروست دكرن، به‌لێ هاریكاری هه‌بوو نوكه چو هاریكاری نینه.
ناڤهاتی خویا كر كو وی پێنج به‌رهه‌م ل به‌ر ده‌ست هه‌نه، به‌لێ ژ به‌ر نه‌بوونا هاریكاریێ وی به‌رهه‌مێن خوه راگرتینه و گۆت: هه‌كه نوكه به‌رهه‌مه‌كی دروست بكه‌م ب تنێ دێ زیان بمن كه‌ڤیت سه‌ره‌رایی ڤێ چه‌ندێ هه‌كه ئاهه‌نگه‌كا بچووك ل كوردستانێ بهێته دانان هونه‌رمه‌ندێن ناڤخۆیی مێهڤان دكه‌ن و هه‌كه ئاهه‌نگه‌كا مه‌زن بیت هونه‌رمه‌ندێن بیانی دهێنه مێهڤانكرن، سه‌ندیكا هونه‌رمه‌ندان و جهێن ره‌وشه‌نبیری هه‌تا نوكه چو پشته‌ڤانیا من نه‌كریه و من پشته‌ڤانیا وان كریه و من مووچه نینه و ئه‌ندامێ سه‌ندیكا ناڤهاتی مه.
لوقمانی گوت ژی: نوكه پتریا هونه‌رمه‌ندان به‌رهه‌مێن خوه ل تورێن جڤاكی به‌لاڤ دكه‌ن و ئه‌ز حه‌ز ژ كارێن باش دكه‌م گه‌له‌ك خوه ب دروستكرنا ستران و به‌رهه‌مان ڤه ماندوو دكه‌م به‌لێ ده‌مێ مفای ژ سترانێ نه‌بینم و ته‌له‌ڤزیۆن دو یان سێ جاران به‌لاڤ كه‌ت و بمریت چو مفا تێدا نینه،سوشیال میدیا ژی یا ئالۆزه و گه‌له‌ك جاران به‌رهه‌مێن هونه‌رمه‌ندێن باش وه‌كو پێدڤی ناهێنه دیتن، ئه‌ڤه دده‌مه‌كی دایه من به‌رهه‌مێن به‌رده‌ست هه‌نه به‌لێ من شیانێن به‌لاڤكرنێ نینن ل سه‌ر ئه‌ركێ خوه چێكه‌م، بریاره سترانا (من ژڤانه) كو سترانه‌كا من یا كه‌ڤنه و من كلیپ كربوو دووباره كلیپ بكه‌مه‌ڤه ب ره‌نگه‌كێ گه‌له‌ك باش و دخوازم دوقۆلی بیت دگه‌ل كچه‌كا ده‌نگخوه‌ش، لێ هه‌تا نوكه من ئه‌و ده‌نگ نه‌دیتیه كو سترانا من ژڤانه دگه‌ل نوو بكه‌مه ڤه ئه‌و ده‌نگێ من ڤیای هێشتا من نه‌دیتیه.
