بۆ جارا دویێ دێ ب زاڤای بێژیت
دهۆك، هه‌رهین محه‌مه‌د:
سترانبێژ (جه‌مال وه‌رمێلی) د دیداره‌كی َدا بۆ به‌رپه‌رێ هونه‌ری یێ رۆژناما ئه‌ڤرۆ دیاركر كو ئه‌ڤه ده‌مه‌كه ئه‌و مژوولی چێكرنا كلیپه‌كێ یه ب ناڤێ (سه‌رشۆیا زاڤای) كو ژپه‌یڤێن مه‌لاعه‌لی شرتی و ئاوازا وێ پشكه‌ك فلكلۆره و پشكا دی ژی یا وی بخوه‌یه، وێنه‌كرن گرۆپێ sm موزیك سه‌عه‌د زه‌یه و ده‌رهێنان عه‌لی تێن و ژقوناغا وێنه‌كرنێ ب دووماهی هاتیه و نوكه د قوناغا مۆنتاژی دایه و ل به‌ره ل ده‌مه‌كێ نێزیك بهێته به‌لاڤكرن، هه‌روه‌سا پشتی ڤێ سترانێ سترانه‌كا دی بۆ بووك و زاڤا هه‌یه، مۆزیكا وێ یا ئاماده‌یه.
هێشتا گۆت: ل سالا 2008 من سترانه‌ك ب شالا زاڤای چێكربوو هه‌ر دوێ سترانێ ژی دا به‌حسێ سه‌رشۆیا زاڤای دهاته‌كرن و ئه‌ڤ سترانه گه‌له‌ك هاته به‌لاڤكرن ب تایبه‌تی بۆ ده‌واتان و ئه‌ڤه ده‌مه‌كی َدرێژ ل سه‌ر وێ سترانێ ده‌رباز بوو و ل سه‌ر داخوازیا گه‌له‌ك نڤیسینگه‌هان من ب خوه ژی حه‌زد كر سترانه‌كا ب ڤی ره‌نگی چێكه‌مه‌ڤه ، چونكو ئه‌ڤ سترانه ژ ستایلێ منه، و سترانێن سه‌رده‌م ژی دبێژم، به‌لێ مه‌ره‌ما من ژ چێكرنا ڤێ سترانێ ئه‌و بوو وه‌كو خه‌لاته‌ك و خزمه‌ته‌ك بۆ بووك و زاڤایێن مه بكه‌م و سترانا دوقۆلێ ژی تاما خوه هه‌یه و ئه‌ڤ سترانه پێدڤی بوو ب دوقۆلی هاتبا گۆتنن به‌لێ ده‌مێ ئه‌ز سترانی دبێژم كورس ل من ڤه دگێرت و دو پارچه مه‌وال ژی دڤێ كلیپێ دا هه‌نه .
ل دووماهیێ گۆت: نڤیسینگه‌ه و كومپانێن مه یێن ده‌واتان مونتاژ دكه‌ن گه‌له‌ك پێدڤی ڤان جۆره سترانان دبن و سترانبێژن مه ژی هه‌موو نابێژن و هه‌كه ئه‌ڤ سترانه دناڤ ته‌له‌فزیۆنان دا گه‌له‌ك ده‌نگ ڤه نه‌ده‌ت دێ دناڤا ده‌واتان دا گه‌له‌ك ده‌نگ ڤه ده‌ت وه‌كو كلیپا من یا به‌ری نوكه و بۆ ڤێ سترانێ سوپاسێن بێ سنور بۆ هونه‌رمه‌ند لوقمان دۆسكی و هه‌ڤالێن ل گه‌ل مه دكلیپێ دا.
