شێروان یێ به‌رهه‌ڤیان بۆ ڤه‌كرنا پێشانگه‌ها خوه یا شێوه‌كاری دكه‌ت
ئه‌ڤرۆ، رێوار:
شێروان یوسف، شێوه‌كاره‌كێ رۆژئاڤایێ كوردستانێ یه نوكه ل وه‌لاتێ ئه‌لمانیا دژیت د دیداره‌كێ دا بۆ رۆژناما ئه‌ڤرۆ خویا كر كو ل هه‌یاما بۆری وی ب پێنج كه‌ڤالێن خوه یێن شێوه‌كاری پشكداری د پێشانگه‌هه‌كا هه‌ڤپشك دا كربوو ل وه‌لاتێ ئه‌لمانیا و بۆ ده‌مێ چار رۆژان ئه‌و پێشانگه‌ه ب پشكداریا 37 هونه‌رمه‌ندان یا به‌رده‌وام بوو كو هونه‌رمه‌ندێن پشكدار هه‌لگرێن ره‌گه‌زنامێن وه‌لاتێن جودابوون، به‌لێ ل وه‌لاتێ ئه‌لمانیا دژیان و گۆت: “نوكه ئه‌ز یێ به‌رهه‌ڤیان بۆ ڤه‌كرنا پێشانگه‌ها خوه یا تایبه‌ت دكه‌م و ل ده‌مه‌كێ نێزیك دێ ل وه‌لاتێ ئه‌لمانیا ڤه‌كه‌م، هه‌روه‌سا د پلانا من دایه 25 كه‌ڤالێن خوه د ڤێ پێشانگه‌هێ دا نیشابده‌م و هه‌كه ده‌لیڤه په‌یدابوو دێ هه‌مان پێشانگه‌ه ل وه‌لاته‌كێ دی ژی ڤه‌كه‌م”.
ناڤهاتی ئاماژه دا وێ چه‌ندێ كو به‌هرا پتریا كه‌ڤالێن ئه‌و چێدكه‌ت ده‌ربڕینێ ژ ژیانا په‌نابه‌ریێ دكه‌ن و وی دڤێت ب رێیا چێكرنا كه‌ڤالێن خوه په‌یامه‌كێ بگه‌هینیته هه‌موو وه‌لاتان كو خوه ل په‌نابه‌ران بكه‌ن خودان و ژ ڤێ ره‌وشا نه‌خوه‌ش یا كو نوكه تێدا دژین رزگار بكه‌ن و گۆت: “د پلانا من دایه ب مه‌ره‌ما ئه‌نجامدانا چه‌ندین كارێن هونه‌ری سه‌ره‌دانا هه‌رێما كوردستانێ ژی بكه‌م، ژ به‌ر كو بۆ ده‌مێ سێ سالان ل هه‌رێمێ ژیایمه و من دڤێت ب رێیا هونه‌ری خزمه‌تا خه‌لكێ وێ بكه‌م”.
