به‌درخان ئه‌مین: ئه‌ز دێ دو سترانێن خوه یێن نوو كلیپ كه‌م
ئه‌ڤرۆ، رێوار محه‌مه‌د ره‌شید:
سترانبێژێ گه‌نج (به‌درخان ئه‌مین) د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ ئاشكرا كر كو ئه‌و ژ كارێ هونه‌ری دوور نه‌كه‌فتیه و پشتی ل رۆژێن بۆری وه‌كو سترانبێژه‌ك ب گۆتنا چه‌ندین سترانان پشكداری د پێشانگه‌ها گه‌شتیاری یا نێڤده‌وله‌تی یا ئێكێ – دهۆك دا كری، نوكه ئه‌و یێ به‌رهه‌ڤیان بۆ كلیپكرنا دو سترانێن خوه یێن نوو دكه‌ت و گۆت: “ئێك ژ وان سترانان بناڤێ (تو د دلێ من دا) ژ په‌یڤێن (سه‌لام یوسف) و ئاوازێن (مه‌هدی سالح)ی نه، سترانا من یا دویێ ژی ل دۆر بابه‌ته‌كێ ئه‌ڤینیێ یه و ژ په‌یڤ و ئاوازێن (مه‌هدی سالح)ی یه كو ئه‌ڤه بۆ ده‌مه‌كێ درێژه من ئه‌ڤ هه‌ر دو سترانه تۆماركرین، به‌لێ هه‌تا نوكه ژ به‌ر هنده‌ك كاودانان و نه‌بوونا چو سپۆنه‌ران من كلیپ نه‌كربوون”.
ناڤهاتی ئاماژه دا وێ چه‌ندێ كو ئه‌و دخوازیت هه‌موو ده‌زگه‌هێن راگه‌هاندنێ ب تایبه‌تی ته‌له‌ڤزیۆن و رادیۆ دادپه‌روه‌ریه‌كا زێده‌تر د په‌خشكرنا به‌رهه‌مێن سترانبێژان دا بكه‌ن و هاریكاریا هه‌موو سترانبێژان وه‌كو ئێك بكه‌ن، چونكو ب دیتنا وی نوكه هه‌تا راده‌كی جوداهی د ناڤبه‌را سترانبێژان دا ژ لایێ ده‌زگه‌هێن راگه‌هاندنێ ڤه دهێته‌كرن و گۆت: “هه‌تا نوكه ئه‌و ده‌لیڤه بۆ من په‌یدانه‌بوویه كو ئه‌ز بشێم سترانه‌كا دوقۆلی ل گه‌ل سترانبێژه‌كا كچ بێژم، ئه‌ڤه دده‌مه‌كی دایه سترانبێژن كچ هه‌تا راده‌یه‌كی ل ده‌ڤه‌را به‌هدینان دكێمن، به‌لێ هه‌ر ده‌مێ ده‌نگێ سترانبێژه‌كا كچ ل گه‌ل ده‌نگێ من یێ گونجایی بیت دێ یێ به‌رهه‌ڤ بم سترانه‌كا دوقۆلی ل گه‌ل بێژم”.
ل دووماهیێ به‌درخانی خویا كر كو ژ ئامیرێن مۆزیكێ گه‌له‌ك حه‌ز ژ ژه‌نینانا ئامیرێ (عودێ) دكه‌ت، به‌لێ نوكه یێ بزاڤان دكه‌ت خوه فێری ژه‌نینا ئامیرێ (ئۆرگێ) ژی بكه‌ت.
