گوهۆرین دێ سه‌ر ب یانا زاخۆ دا هێن
ئه‌ڤرۆ،عه‌لی حاجی:
ل دووڤ ژێده‌رێن ده‌ست ب رۆژناما ئه‌ڤرۆ كه‌ڤتین بلند شه‌فیق وه‌كو سه‌روكێ یانا زاخۆ یا وه‌رزشی ل جهێ حه‌مید سه‌لمان هاتیه دانان به‌ری ده‌ستپێكرنا هه‌لبژارتنێن یانێن وه‌رزشی ئه‌وا بڕیاره پرۆسه‌یا وێ ل 20/10/2021ێ هێنه برێڤه‌برن.
هه‌مان ژێده‌ری گۆت: هه‌ر چه‌نده ده‌ست نیشان كرنا بلند شه‌فیقی بۆ وه‌رگرتنا پوستێ سه‌روكاتیا یانا زاخۆ نه‌بویه فه‌رمی لێ چاڤه‌ڕێ دهێته كرن ده‌مه‌كێ نێزیك دا ب فه‌رمی بهێته راگه‌هاندن بۆ جه‌ماوه‌رێ وه‌رزشی و ژلایێ خوه‌ڤه لایه‌نێن په‌یوه‌ندیدار ل ئیدارا زاخۆ كۆمبوون ژی ئه‌نجامداینه و رازینه لسه‌ر ڤێ پێنگاڤێ كو بلند شه‌فیق وه‌كو به‌ربژێرێ سه‌ره‌كی بۆده‌سته‌كا نوو یا یانێ بهێته دانان و هه‌روه‌سان چاڤه‌ڕێ یه ده‌سته‌كا نوو ژی بۆ ئه‌ندامێن یانێ بهێته دروستكرن پێخه‌مه‌ت زێده‌تر پشته‌ڤانی و خزمه‌تا یانا زاخۆ بهێته كرن تایبه‌ت تیمێن وان یێن پشكدار د خولێن كوردستانێ و ئیراقێ دا، پێنه‌ڤێت ئه‌ڤ پێنگاڤه ژی لدووڤ پلانێن رێكۆپێكه بۆ گشت یانێن پارێزگه‌هێ دهێنه كرن تایبه‌ت د پۆستێن كارگێری دا پشتی بورینا ده‌مێ كارگێریێ یێ چار سالان ب دووماهی هاتی.
هه‌روه‌سا ئه‌وی ژێده‌ری دیاركر ژی كو نه به‌رده‌وامیا سه‌رۆكێ یانێ حه‌مید سه‌لمانی ل گه‌ل كارگێریێ و خوه نه به‌ربژێركرنێ ژبه‌ركو رێنومایێن رێڤه‌به‌ریا گشتی یا وه‌رزشی دڤێت یێ خوه بۆ سه‌روكاتیێ هه‌لبژێریت خودان باوه‌رنامه‌یا ئاماده‌یی و سه‌ر دابیت، ب لێبوورین ڤه ناڤهاتی باوه‌رنامه نه‌بوویه له‌ورا ئێك ژ ئه‌گه‌رێن ڤێ پێنگاڤێ یه، یا گرنگ هه‌بوونا ژماره‌كا مه‌زن یا كه‌سانێن وه‌رزشڤان و پشته‌ڤانێن یانا زاخۆ هه‌نه دێ خزمه‌تا ڤێ یانێ كه‌ن.
ژلایێ خوه‌ڤه حه‌مید سه‌لمان سه‌روكێ ده‌ست كار كێشایی یێ یانا زاخۆ گۆت: ب فه‌رمی ده‌ست ژ پوستێ سه‌وركاتیا یانا زاخۆ به‌ردایه و من ماف نینه بۆ چار سالێن دی خوه به‌ربژێر بكه‌ت بۆ سه‌روكاتیێ ژبه‌ركو رێنمایێن رێڤه‌به‌ریا گشتی یا وه‌رزشی یا هه‌رێمێ مه‌رجێ هه‌بوونا باوه‌رنامه‌كا بلند بۆ سه‌رۆكێ یانێ دانایه، هه‌كه داخاز ژ من هاته كرن خوه به‌ربژێر ژی بكه‌م و پشته‌ڤانی بڤی ره‌نگی بیت رازی نابم، ژبه‌ركو ماوێ چار هه‌یڤه به‌رسڤا نڤیسارا مه نه‌هاتیه دان لسه‌ر داخازیێن مه، له‌ورا هه‌كه د پوستێ خوه ژی دا بمینم و پشته‌ڤانی نه‌بیت نه‌شێم دووباره كارێ خوه بڕێڤه‌ببه‌م و ئه‌وا هاتیه كرن ژی ب ماندیبوونا مه بوویه.
