ته‌ها هێتوتی: نه‌شیایمه ژیانا خوه ب داهاتێ سترانگۆتنێ ببورینم
ئه‌ڤرۆ:
سترانبێژێ كوچكۆ دیوانا ته‌ها هێتوتی، د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: گه‌له‌ك جورێن سترانان هه‌نه وه‌كو یا فلكلۆری و یا شه‌را و یا ئه‌ڤینی و پایزوك و حه‌یران و ل وی ده‌می دێ سه‌حكه‌مێ كا خه‌لكی َمه حه‌زژ كیژ جورێ سترانێ دكه‌ت دێ وێ سترانێ كلیپ كه‌م و مه سترانبێژێ فلكلۆر و یێ ده‌واتان هه‌نه و هه‌ر دو گرێدایی فلكلۆری نه سترانبێژێ كوچكۆ دیوانان هه‌تا نوكه من نه‌دیتیه سترانبێژ ب سترانێن كوچكۆ دیوانا ده‌وله‌مه‌ند بووین، به‌لێ سترانبێژێن ده‌واتان ره‌وشا وان باشتره و ژیانا خوه ب رێڤه دبه‌ن، به‌لێ ب وی ئاستی ده‌وله‌مه‌ند نه‌بووینه كو بێژین ب ستران گۆتنێ یێ ده‌وله‌مه‌ند بووی .
ناڤهاتی گۆت ژی: سترانا كوردی یا ره‌سه‌ن چو تشت ژ من وه‌رنه‌گرتیه، به‌لێ وه‌كو ئابور و ژیان نه دایه من و نه‌شیایمه ژیانا خوه ب وی داهاتێ ژ هونه‌ری دگه‌هیته من ببورینم، هه‌كه جاره‌كێ چووبمه تیڤیه‌كێ، یان رادیۆیه‌كێ دیاریه‌ك دابیته من، به‌لێ ئه‌و ناگه‌هیته وێ رامانێ كو ژیانا من یا خوه‌ش و به‌رفره‌ه كری، لێ سترانێ رێزگرتنا خه‌لكی دایه من.
ل دوووماهیێ ته‌ها دبێژیت: سترانێن من ل رادیۆ ته‌له‌ڤزیۆن و یوتوبی د ئه‌رشیف كرینه، داكو نه هێنه به‌رزه‌كرن و ل توورا جڤاكی یا فه‌یسبووكی ژی به‌لاڤ دكه‌م بۆ وێ چه‌ندێ حه‌زژێكه‌رێن ده‌نگێ خوه ژ گوهداریا سترانێن خوه بێ به‌هر نه‌كه‌م.
