شارا قه‌ره‌داخی: پێدڤیه میدیاكار خوه بكه‌نه پێشه‌نگ بۆ نڤشێ بهێت
دهۆك، شاكر ئه‌تروشی:
خانما میدیاكار (شارا شێخ محه‌مه‌د قه‌ره‌داخی) كو ب شارا قه‌ره‌داخی یا به‌رنیاسه، د دیداره‌كێ دا بۆ رۆژناما ئه‌ڤرۆ گۆت: دژیه‌كێ بچووك دا حه‌زا كاركرنێ دوارێ راگه‌هاندنێ دا بۆ من چێبوو، لێ ل سالا 2012 ل باژێرێ به‌غدا ده‌لیڤه هات و بۆ جارا ئێكێ من ل ئاژانسا (موسسه المسا‌و نیوز) هه‌روه‌سا (الاهرام المصریه) كاركر، هه‌روه‌سا ئه‌و چه‌نده بۆ ئه‌گه‌ر كو دوارێ بازرگانی و رێكخراوێن جڤاكێ مه‌ده‌نی ژی دا كاربكه‌م و وه‌كو ژنه‌كا كورد خوه سه‌رفراز دبینم كو دوارێن جودا جودا دا خزمه‌تا وه‌لاتێ خوه دكه‌م.
شارایێ گۆت: مه‌رجه ئه‌و كه‌س یان كه‌سا دوارێ راكه‌هاندنێ دا كاردكه‌ت ره‌وشه‌نبیریه‌كا باش ل ده‌ف هه‌بیت دا بشێت ب شێوه‌كێ دروست گازنده و ئێش و ئازارێن خه‌لكه‌كی ب تایبه‌ت چینا هه‌ژاران بگه‌هینته جهێن شۆله‌ژێ دا بله‌ز چاره‌كێ بۆ ببینن و هه‌ر ده‌م من گۆتیه ئه‌و میدیاكارێ ره‌وشه‌نبیریه‌كا باش ل ده‌ف نه بیت هه‌روه‌سا یێ ئازاد و ب جورئه‌ت نه‌بیت وه‌كو وی كه‌سی یه ئه‌وێ بێ چاڤ و دبه‌ر خه‌لكی را دبۆریت و وان نه‌بینین، ئانكو پێدڤیه میدكار خوه بكه‌نه پێشه‌نگ بۆ نڤشێ بهێت.
ل دووماهیێ گۆت: راگه‌هاندن ئانكو گه‌هاندنا ره‌وشه‌نبیریێ و بوچۆنێن ئازاد، هه‌روه‌سا گه‌هاندنا ئازارێن ملله‌تی و دابینكرنا ئاسانكاریان بۆ كه‌سێن لێقه‌ومای و كێم ئه‌ندام و ئافره‌ت سته‌ملێكریان، هه‌روه‌سا پێدڤیه ببیته فاكته‌ره‌ك بۆ به‌ره‌ڤانیكرن و پاراستنا ده‌ستكه‌فتێن ملله‌تی، ژبۆ هندێ دا جڤاكی به‌ر ب پێشڤه ببه‌ت، هه‌روه‌سا بزاڤێ بكه‌ت ره‌وشه‌نبیریا هه‌ڤدۆقه‌بوولكرنێ و ژینگه‌ه پارێزیێ نیشا وان بده‌ت و ژ میدكارێن كورد ئه‌ز ب (شاهۆ ئه‌مین) و یێن عه‌ره‌بی ژی(موئه‌یه‌د به‌دری و جۆرج قرداحی) داخبارم.
