كاروان حه‌مید: هه‌كه پشته‌ڤانیا من بهێته كرن دێ سرووده‌كا نه‌ته‌وه‌یی ل ئورۆپا به‌رهه‌م ئینم
ئه‌ڤرۆ، زنار تۆڤی:
سترانبێژ و مۆزیكژه‌ن كاروان حه‌مید حه‌لاق، نوكه ل وه‌لاتێ هۆله‌ندا دژیت، د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دیار كر: چوونا من بۆ ئورۆپا، ده‌لیڤه‌كا زێده‌تر ب من به‌خشی، ژ پێخه‌مه‌ت ئه‌ز پتر گرنگیێ ب هونه‌ری بده‌م و دیسان خه‌مێن ژ ده‌ستدانا دو زارۆیێن من و دووریا وه‌لاتی ژی بوونه ئه‌گه‌ر، كو ئه‌ز ب رێیا هونه‌ری وان ئازاران ژبیر بكه‌م و ل سه‌ر خه‌م و ژانێن خوه دا زال ببم، هه‌روه‌سا هه‌كه مرۆڤ هونه‌ری راست بگریت دێ رێیا راست و دروست نیشا مرۆڤی ده‌ت، چو جاران ناهێلیت مرۆڤ بكه‌ڤیت و ب ڤی ره‌نگی مرۆڤ دێ گه‌هیته هه‌موو ئارمانجێن خوه، دیسان ئه‌ز ئامیرێن هه‌وایی ژی دژه‌نم.
ناڤهاتی گۆت ژی: د هه‌موو كاران دا ئاسته‌نگی و نه‌خۆشی هه‌نه، هه‌روه‌سا ئه‌ڤ چه‌نده ل ده‌رڤه‌ی وه‌لاتی پتره، چونكی نه ب تنێ ئه‌ز كارێ هونه‌ری دكه‌م، ژ بۆ ب ده‌ست خستنا پاریێ ژیانێ ئه‌ز كاره‌كێ دیتر ژی دكه‌م، لێ ئه‌ز چو جاران ژ كارێ هونه‌ری دوورنه‌كه‌فتیمه و هندی ئه‌ز شیان هه‌بن، دێ خزمه‌تا هونه‌رێ كوردی كه‌م.
كاروان هێشتا دبێژیت: د وان هه‌موو فیسته‌ڤالێن من پشكداری تێدا كری، ئه‌ز شیایمه كه‌لتۆر و فه‌رهه‌نگ و جلێن كوردی بۆ خه‌لكێ جیهانێ بده‌مه نیاسین، هه‌تا نوكه من كارێن گه‌له‌ك باش ئه‌نجامداینه، هه‌روه‌سا ب ئه‌گه‌رێ لبه‌ركرنا جلێن كوردی و گۆتنا سترانێن كوردی ل دووماهیا وان فیسته‌ڤالان من گه‌له‌ك دیدار ئه‌نجامداینه، ئه‌ڤه جهێ شانازیه‌كا مه‌زنه بۆ من، كو ئه‌ز شیایمه ڤان كاران ئه‌نجام بده‌م و چو جاران ده‌ستكه‌فتێن تاكه كه‌سی بۆ من د گرنگ نینن، مه‌ره‌ما من ژ ڤی كاری خزمه‌تكرن و ناساندنا ملله‌تێ كورده ل هه‌موو جیهانێ.
ئه‌و هونه‌رمه‌نده هێشتا دبێژیت: خه‌ونا من یا مه‌زن ئه‌وه، كو ئه‌ز سرووده‌كا نه‌ته‌وه‌یی دروست بكه‌م، ڤی كاری ژی مه‌زاختنه‌كا مه‌زن دڤێت، هه‌كا نوكه ئه‌ز نه‌شیایمه ڤی كاری ئه‌نجام بده‌م، چو كه‌س و لایه‌نان ژی هاریكاریا من نه‌كریه، بۆ چێكرنا ڤی به‌رهه‌می، هه‌ر چه‌نده من په‌یوه‌ندی ب گه‌له‌ك ئالیان كریه، لێ هه‌تا نوكه كه‌سێ به‌رسڤا من نه‌دایه و یا بێ ئه‌نجام بوویه، نێزیكی 100 موزیكژه‌نێن بیانی دێ پشكداریێ د وی به‌رهه‌می دا كه‌ن و دێ كاره‌كێ گه‌له‌ك جوان بیت، هه‌كه بهێته به‌رهه‌مئینان.
ئه‌و چه‌ند ژی ئاشكرا كر: نوكه گه‌له‌ك كارێن نوو لبه‌ر ده‌ستێ وی هه‌نه، لێ ژ به‌ر كو تۆماركرنا هه‌ر كاره‌كێ هونه‌ری گه‌له‌ك مه‌زاختن دڤێت، له‌وما وی لبه‌ر نینه نوكه چو كارێن نوو ئه‌نجام بده‌م، هه‌ر چه‌نده هه‌ر سال ئه‌و كاره‌كێ نوو یێ هونه‌ری به‌لاڤ دكه‌ت، د هه‌مان ده‌م دا ئه‌و سه‌ركه‌فتنا خوه د هندێ دا دبینیت، ده‌مێ راگه‌هاندنا كوردی به‌حسێ كارێن وی دكه‌ن و ئه‌ڤه بۆ وی سه‌ركه‌فتنه‌كا مه‌زنه و گۆت: “هندی د ژیانێ دا مابم دێ خزمه‌تا گه‌ل و وه‌لاتێ خوه ب رێیا هونه‌ری كه‌م”.
