كلیپه‌كا نوو دی به‌لاڤ كه‌ت
دهۆك، زنار تۆڤی:
خانما سترانبێژ ناتالیا، كو نوكه ل وه‌لاتێ ئه‌لمانییا دژیت، د دیداره‌كێ دا بۆ رۆژناما ئه‌ڤرۆ دیاركر كو به‌ری چه‌ند رۆژان وێ سترانه‌كا نوو ب ناڤێ دایكا من تۆماركریه، ئه‌ڤ سترانه ژ په‌یڤ و ئاوازێن هونه‌رمه‌ند دلۆڤانی نه، ل باژێرێ به‌رلین ل وه‌لاتێ ئه‌لمانییا كلیپ كریه، رێناس میران ب كارێ كلیپكرنا وێ سترانێ رابوویه، و نوكه ئه‌و مژوولی كلیپكرنا به‌رهه‌مه‌كێ نوویه، كو سترانه‌ك ل گه‌ل كۆما زۆزان یا رۆژئاڤایێ كوردستانێ چێكریه، ئه‌و سترانان ب هه‌ردو زمانێن كوردی و ئه‌رمه‌نی دبێژیت و حه‌ز دكه‌ت سه‌ره‌دانا هه‌رێما كوردستانێ بكه‌ت.
ناتالیایێ گۆت: هه‌تا نوكه من حه‌فت كلیپ چێكرینه، ژبه‌ر نه‌بوونا ده‌می و دیسان كارێ من وه‌كو پارێزه‌ر ئه‌ز نه‌شییایمه وه‌كو پێدڤی سترانان تۆماربكه‌م، به‌لێ دسالا نوودا دێ هنده‌ك سترانێن نوو به‌لاڤكه‌م، دیسان ئه‌ز یا بزاڤان دكه‌م كو ئه‌لبۆمه‌كێ ژی تۆمار بكه‌م، به‌لێ دنوكه دا خه‌لك هند گۆهداریا ئه‌لبۆمێن سترانان ناكه‌ن، به‌لكو پتر به‌رێ خوه دده‌نه كلیپان، به‌لێ چێكرنا ئه‌لبۆمێ دبیته ناسنامه بۆ هونه‌رمه‌ندی و دێ مینیته د ناڤا ئه‌رشیفێ هونه‌ر و سترانا كوردی دا، دیسان ژی ل ڤی سه‌رده‌می هونه‌رمه‌ند ب كلیپان دهێنه نیاسین، له‌وما ئه‌ز پتر گرنگییێ ب چێكرنا كلیپان دده‌م، د هه‌مان ده‌مدا من ل به‌ره چه‌ندین سترانێن سینگل تۆمار بكه‌م و وان سترانان كلیپ بكه‌م و به‌لاڤ كه‌م.
