هه‌موو ده‌م بۆ سترانگۆتنێ د خۆشن
دهۆك، هه‌رهین محه‌مه‌د:
سترانبێژ مارتێن هۆرمز، دیداره‌كێ دا بۆ رۆژناما ئه‌ڤرۆ دبێژیت: ژ زارۆكینیا خوه دا من حه‌زا سترانگۆتنێ هه‌بوویه و ل گه‌ل دژیم، به‌لێ ئه‌ڤه بۆ ده‌مێ ده‌ه سالایه ب شێوه‌كێ فه‌رمی سترانا دبێژم ل ئاهه‌نگ و لایف مۆزیكا ل كافی و رێستوره‌نتان ل دهۆكێ و هه‌ولێرێ و هه‌رجهه‌كێ من داخواز بكه‌ن و د لایف مۆزیكان دا سترانێن هه‌موو سترانبێژێن به‌رێ و و نوكه دبێژم، ب تایبه‌تی یێن هونه‌رمه‌ند ئه‌یاز یوسف و ئه‌رده‌وان زاخۆیی و ته‌حسین تاها و ل ده‌ستپێكێ من ستران ب عه‌ره‌بی دگۆتن، پاشان بوونه كوردی، دووڤدا سریانی و گه‌له‌ك حه‌زژ ده‌نگێ هونه‌رمه‌ندێ نه‌مر ته‌حسین تاهای دكه‌م و هه‌كه جاره‌كێ سترانه‌كا وی نوو كه‌م دێ سترانا (تۆ خه‌ون بووی هه‌می گاڤا) بیت و سترانان دبێژم نه كو ژبه‌ر ب ده‌ستڤه ئینانا پاران سترانان دبێژم، به‌لێ پاره بۆ سترانبێژی دبیته پالپشت نوویاتیان بكه‌ت و یێ به‌رده‌وام بیت و مه‌ره‌ما من یا سه‌ره‌كی ئه‌وه نامه‌كێ ب گه‌هینم ب رێیا هونه‌رێ خوه، به‌لێ هه‌تا نوكه ئه‌و نامه من نه گه‌هاندیه، چونكو هێشتا ئه‌ز یێ ل ده‌ستپێكا هونه‌رێ خوه.
هه‌روه‌سا گۆت: بۆ من هه‌موو ده‌م بۆ سترانگۆتنێ د خۆشن، به‌لێ سترانگۆتن ل سه‌ر ستێجی و به‌رامبه‌ر خه‌لكی وه‌كو یاریا ته‌پاپێ یه و هه‌كه بێ بینه‌ر بیت چو تاما خوه نینه و سترانگۆتنێ ژی هه‌كه ل جهه‌كی بێژی و چ كه‌س لێ نه بیت چ خۆشی تێدانینه.
