كچێن كورد شیاینه ب وێره‌كانه خوه دناڤ هونه‌ری دا ببینن
دهۆك، زنار تۆڤی:
خانما سترانبێژ غه‌زال، خه‌لكا باژێرێ ئاگری یه ل باكۆرێ كوردستانێ و نوكه ل باژێرێ قه‌رسێ دژیت، د دیداره‌كێ دا بۆ رۆژناما ئه‌ڤرۆ دیاركر كو د ژیێ نه‌ه سالیێ دا وێ ده‌ست ب گۆتنا سترانان كریه و مالباتا وێ گه‌له‌ك پشته‌ڤانی ل كریه، كو سترانان بێژیت و هه‌تا نوكه چار كلیپ چێكرینه و نوكه مژوولی كلیپكرنا سترانه‌كا نوویه دێ ل باژێرێ ئیسته‌مبۆلێ كلیپ كه‌ت و ل سه‌رێ سالێ دێ به‌لاڤ كه‌ت.
ناڤهاتییێ گۆت: هه‌تا نوكه وێ چو ئه‌لبۆم به‌لاڤ نه‌كرینه، ئه‌و ڤێ چه‌ندێ ڤه‌دگه‌رینیت بۆ ده‌ست كورتییا بارێ ژیانێ، دیسان هه‌تا نوكه وێ چه‌ندین سترانێن سینگل ژی تۆماركرینه، و هنده‌ك سپۆنسه‌ر ل باكۆرێ كوردستانێ و ئورۆپا هه‌نه، هاریكاریا وێ دكه‌ن و ئه‌و گه‌له‌ك یا گه‌شبینه ب هونه‌رێ كوردی و ل دووڤ گۆتنا وێ، كچێن كورد شیاینه ب وێره‌كانه خوه دناڤ هونه‌رێ كوردی دا ببینن و ئه‌و حه‌ز دكه‌ت، سترانێن سینگل تۆماربكه‌ت و كلیپ بكه‌ت، چونكی د نوكه دا كلیپێ گه‌له‌ك گرنگی و رۆلێ خوه هه‌یه، و ژبه‌ر گرتنا كه‌نال و رادیۆیێن كوردی ل باكۆرێ كوردستانێ ژ ئالیێ ده‌وله‌تا تورك ڤه، ئه‌و كارێن خوه یێن هونه‌ری ل تۆرێن جڤاكی به‌لاڤ دكه‌ن.
