به‌دیل ئیبراهیم: هه‌رێما كوردستانێ بوویه مالا هه‌موو هونه‌رمه‌ندێن كورد
دهۆك، زنار تۆڤی
سترانبێژ به‌دیل ئیبراهیم، كوخه‌لكێ باكورێ كوردستانێ یه و نوكه ل وه‌لاتێ ئه‌لمانیا دژیت، د دیداره‌كێ دا بۆ رۆژناما ئه‌ڤرۆ دیاركر كو نوكه ئه‌و مژوولی تۆماركرنا سێ سترانێن سینگله، هه‌رسێ د قوناغا دووماهیێ دانه، دو ژ وان ئه‌ڤینی نه و ئێك ژی فولكلۆره.
ناڤهاتی گۆت: من ل به‌ره ل نێزیك بهێمه كوردستانێ و ل دهۆكێ و زاخۆ و ئه‌و جهێن سروشته‌كێ جوان لێ هه‌ی، دێ وان سترانان ل وێرێ كلیپ كه‌م، هه‌روه‌سا نوكه فرۆتنا ئه‌لبۆمێن سترانان ب زه‌حمه‌ت كه‌فتییه، ژبه‌ر هه‌بوونا سۆشیال میدیایێ ئێدی ئه‌لبۆمان هند گرنگییا خوه ل بازاری نه‌مایه، به‌لێ مۆزیكا كوردی پێشكه‌فتنه‌كا باش ب خوه‌ڤه دیتیه، ئه‌ڤ چه‌نده ڤه‌دگه‌ریت ژبه‌ر هه‌بوونا هه‌رێما كوردستانێ، پشكه‌كا ئازاد یا كوردستانێ یه، ڤێ چه‌ندێ وه‌كریه، كو هه‌رێما كوردستانێ ببیته مالا هه‌موو هونه‌رمه‌ندێن كورد، له‌وما ده‌مێ وه‌لات ئازاد بیت، دێ مۆزیك ژی ئازاد بیت و دێ پێشكه‌ڤیت، هه‌ر ده‌مێ وه‌لاتێ مه هه‌موو ئازاد ببیت، هنگێ دێ مۆزیكا مه ژی ژ یا تورك و عه‌ره‌ب و فارسان پێشكه‌فتیتر بیت، د هه‌مان ده‌مدا نوكه پتر كاتێكرنا مۆزیكا كوردی ل سه‌ر یا توركی و عه‌ره‌بی وفارسی هه‌یه، هه‌ر چه‌نده هنده‌ك كارتێكرنا مۆزیكا وان وه‌لاتان ل سه‌ر هنده‌ك سترانبێژێن كورد هه‌یه، لێ ب گشتی پتر ل سه‌ر یا وان وه‌لاتان هه‌یه.
زێده‌تر گۆت: بنگه‌هێ هونه‌رێ من ل سه‌ر سترانا فولكلۆری هاتیه ئاڤاكرن، دیسان ئه‌ز ب سترانا سالێ هاتیمه نیاسین، كو ئه‌و ژی سترانه‌كا فولكلۆری بوویه، هه‌روه‌سا ئه‌ز به‌رهه‌ڤییان بۆ چێكرنا ئه‌لبۆمه‌كا سترانێن فولكلۆری دكه‌م، كو ژ ( 8- 12) سترانان پێك دهێت، و حه‌ز دكه‌م ل دووماهییا سالا 2022 به‌لاڤ بكه‌م، هه‌روه‌سا د به‌رنامێ مندا هه‌یه سترانێن دویت ل گه‌ل سترانبێژن نیلۆفه‌ر ئاكبال و چۆپی فه‌تاح بێژم، هه‌ر چه‌نده هه‌تا نوكه من ئه‌ڤ بابه‌ته ل گه‌ل وان ڤه‌نه‌كرییه، دیسان بابه‌تێ سترانه‌كا دیت من ل گه‌ل هونه‌رمه‌ند شڤان په‌روه‌ری به‌حس كریه و من به‌رهه‌مه‌ك بۆ وی فرێكریه، لێ هێشتا بریارا تۆماركرنا وێ سترانا دویت نه‌هاتییه دان.
