دخوازیت پێشانگه‌هێن شێوه‌كاری ل هه‌موو وه‌لاتێن جیهانێ ڤه‌كه‌ت
ئه‌ڤرۆ، زنار تۆڤی:
شێوه‌كار خالد حسێن، د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دیار كر: ئه‌و خه‌لكێ عه‌فرینێ یه ل رۆژئاڤایێ كوردستانێ و ل سالا 2009 وی پشكا شێوه‌كاری ل په‌یمانگه‌ها هونه‌رێن جوان ل حه‌له‌بێ ب دووماهی ئینایه، پشتی ره‌وشا رۆژئاڤایێ كوردستانێ ئالۆز بوویی ئه‌و چوویه وه‌لاتێ ئه‌لمانیا و نوكه ل وی وه‌لاتی دژیت، هه‌روه‌سا به‌ری چه‌ند رۆژان وی پشكداری د پێشانگه‌ها رۆدگوا ئارت یا 21 ێ دا كریه ل باژێرێ فرانكفۆرت ل وه‌لاتێ ئه‌لمانیا، كو ئه‌ڤ پێشانگه‌هه سالانه دهێته ڤه‌كرن و گۆت: ” ئه‌ڤه جارا شه‌شێ یه ئه‌ز پشكداریێ د ڤێ پێشانگه‌هێ دا دكه‌م، ڤێ جارێ 77 شێوه‌كارێن ئه‌لمانی و جیهانی پشكداری تێدا كریه و ب تنێ من وه‌كو كورد ب چار كه‌ڤالان پشكداری د وێ پێشانگه‌هێ دا كریه، د هه‌مان ده‌م دا ب 26 كه‌ڤالان من پشكداری د پێشانگه‌هه‌كا دیتر دا كریه و ئه‌و پێشانگه‌هه دێ هه‌تا 27 ی ڤێ هه‌یڤێ یا به‌رده‌وام بیت و هه‌تا نوكه من چه‌ندین كه‌ڤال ل وێ پێشانگه‌هێ ژی فرۆتینه و خه‌لكێ ئه‌لمانی پتر ژ كوردان كه‌ڤالێن من دكرن”.
ناڤهاتی گۆت ژی: ناڤه‌رۆكا كه‌ڤالێن من ل سه‌ر په‌نابه‌ران و ل سه‌ر وان ئێش و ئازار و ده‌رده‌سه‌رییانه یێن ب سه‌رێ ملله‌تێ مه دا هاتین، ل هه‌موو پارچێن كوردستانێ، د هه‌مان ده‌مدا من چه‌ندین پێشانگه‌هێن تایبه‌ت ژی ڤه‌كرینه، نوكه ژی ئه‌ز كار ل سه‌ر چه‌ندین كه‌ڤالێن نوو دكه‌م، د هه‌موو پێشانگه‌هان دا ئه‌ز كه‌ڤالێن خوه دفرۆشم، دیسان ل وه‌لاتێن وه‌كو ئیسپانیا و ئه‌مریكا و ئیتالیا و ئه‌لمانیا و هۆله‌ندا و چه‌ندین وه‌لاتێن دیتر ژی من كه‌ڤالێن خوه فرۆتینه، ئه‌ڤ ساله ژی من هژماره‌كا كه‌ڤالان فرۆتینه.
خالدی ئه‌و چه‌ند ژی ئاشكرا كر: حه‌زا من یا سه‌ره‌كی ئه‌وه ئه‌ز بهێمه هه‌رێما كوردستانێ، ل وێرێ ژی پێشانگه‌هێن شێوه‌كاری ڤه‌كه‌م، خزمه‌تا خه‌لكێ خوه یێ كوردستانێ بكه‌م، هونه‌رێ خوه بۆ وان بده‌مه نیاسین، دیسان هیڤییا من ئه‌وه ئه‌ز ل هه‌موو وه‌لاتێن جیهانی پێشانگه‌هێن تایبه‌ت یێن شێوه‌كاری ڤه‌كه‌م، داكو ب ڤێ رێكێ هونه‌رێ خوه بۆ خه‌لكێ جیهانێ بده‌مه نیاسین، د هه‌مان ده‌مدا ئه‌و جلێن كوردی دناڤا كه‌ڤالێن خوه نیشان دده‌ت، مه‌ره‌ما ژڤی كاری ئه‌وه، كو ئه‌و ئێش و ئازارێن كوردان ب رێیا وان كه‌ڤالان بۆ خه‌لكێ جیهانێ بده‌ته نیاسین، هه‌روه‌سا د هه‌موو پێشانگه‌هێن وی پشكداری تێدا كری كه‌ڤالێن خوه فرۆتینه.
