مه‌جید ده‌روێش: دخوازم كاره‌كێ سینه‌مایێ ل دهۆكێ ئه‌نجام بده‌م
دهۆك، شاكر ئه‌تروشی:
مه‌جید ده‌روێش نه‌جات، نڤیسه‌ر و ده‌رهێنه‌رێ كورته فلمێ (سیبه‌ر) یێ كو به‌ری سێ رۆژان ل گه‌را هه‌شتێ یا فلمه فیسته‌ڤالا سینه‌مایی ل دهۆكێ هاتیه نیشادان، د دیداره‌كێ دا بۆ رۆژناما ئه‌ڤرۆ گۆت: به‌ری هه‌ر تشته‌كی ئه‌زێ گه‌له‌كێ دلخۆشم كو هاتیمه باژێرێ دهۆكێ و پشكداری د فیسته‌ڤالێ دا كری، كورته فلمێ من (سیبه‌ر) ده‌مێ وی پازده خوله‌كن، ناڤه‌رۆكا وی ل دۆر بكارئینانا مادێن هۆشبه‌ره، چنكو نوكه ل پرانیا وه‌لاتێن جیهانێ ئه‌ڤ چه‌نده یا بوویه دیارده‌كا مه‌ترسیدار و مه بزاڤا كری خه‌لكه‌كی ب تایبه‌ت ژی گه‌نجان ژ بكارئینانا وان دووربێخین، چنكو گه‌له‌ك خێزان ژ به‌ر بكارئینانا وان ژناڤ چووینه و پێنج ئه‌كته‌ران پشكداری د كورته فلمی دا كرینه، ئه‌و ژی (شه‌بنه‌م یوسفی، به‌هار مه‌عرۆفی، حه‌بیب فه‌ره‌ج مه‌ند، كامێلا شاهین، ئیسلام ئالۆسی) دیه‌نێن كورته فلمی ل باژێرێ ئۆرمیێ هاتینه وێنه‌كرن و به‌ری نوكه ل چه‌ندین فیسته‌ڤالێن جیهانی هاتیه نیشادان، ژوانا ل باژێرێ هامبۆرگ ل ئه‌لمانیا، بۆ زانین سپۆنسه‌ر و پرۆدۆسه‌رێ ڤی كورته فلمی به‌رێز (حكمه‌ت سوله‌یمانی) یه و ل سه‌ر ئه‌ركێ وی هاتیه چێكرن.
ل دووماهیێ گۆت: به‌ری نوكه من چه‌ندین سیناریۆ نڤیسینه، هه‌روه‌سا كارێ ده‌رهێنانێ بۆ چه‌ندین شانۆگه‌ریان كری یه، هه‌روه‌سا پشكداری د چه‌ندین فیسته‌ڤالان دا كریه، ژوانا فیسته‌ڤالا (الفجر) كو ب فیسته‌ڤاله‌كا هه‌ره مه‌زن ل وه‌لاتێ ئیرانێ دهێته نیاسین و دخوازم ژ نوكه وێڤه من په‌یوه‌ندیێن باشتر ل گه‌ل هونه‌رمه‌ند و سینه‌ماكارێن دهۆكێ هه‌بیت و هیڤیا من ئه‌وه رۆژه‌ك بهێت كاره‌كێ سینه‌مایێ ل دهۆكێ ئه‌نجام بده‌م.
