شه‌هرام میرحاج: راگه‌هاندنا كوردی د ئاستێ پێدڤی و پرۆفیشنال دا نینه
دهۆك، شاكر ئه‌تروشی:
میدیاكارێ به‌رنیاس (شه‌هرام میرحاج) كو نوكه پێشكێشكارێ به‌رنامێ (رۆژه‌ڤا كوردستانێ) یه، ل ده‌زگه‌هێ سه‌ته‌لایتا كوردستانێ، د دیداره‌كێ دا بۆ رۆژناما ئه‌ڤرۆ گۆت: ده‌مێ ئه‌م گه‌نج ل ئیرانێ حه‌زا كاركرنێ دوارێ راگه‌هاندنێ ل ده‌ف په‌یدابوو، له‌ورا من گه‌له‌ك حه‌ز ژ خواندنێ دكر و به‌رده‌وام ب ریێیا كه‌نالێن راگه‌هاندنێ دووفچوونا روودانێن جیهانێ دكر، هه‌روه‌سا به‌رده‌وام رۆژنامه و گۆڤارێن وی وه‌لاتی ده‌ردكه‌فتن دخواندن و ده‌مێ ئه‌م ڤه‌گه‌ڕیاینه كوردستانێ بۆ قسمه‌ت و هه‌تا نوكه یێ به‌رده‌وامم.
شه‌هرامی گۆت: ده‌ركه‌فتنا منا ئێكێ ل كه‌نالێ كه‌ی تیڤی یێ لۆكالی بوو، دووڤدا به‌رنامێن جۆدا جۆدا هه‌بوون وه‌ك (دوسیه، نه‌رین، دیداری زاگرۆس، دیبه‌یت و دیدارێن تایبه‌ت ل گه‌ل زاگرۆس و نوكه ژی ل كوردستان تیڤی من به‌رنامێ رۆژه‌ڤا كوردستانێ هه‌یه، و به‌رنامێن ئه‌ز پێشكێش دكه‌م سیاسی نه و ره‌نگه هنده‌ك گوهۆڕین د شێوازێ به‌رنامه‌ی دا بهێنه كرن، به‌لێ ناڤه‌رۆك ئێك ره‌نگه، به‌لێ مخابن ئاستێ راگه‌هاندنا كوردی د ئاسته‌كێ پێدڤی و پرۆفیشنال دا نینه، راسته هنده‌ك پێنگاڤێن باش هاتینه هاڤێتن به‌لێ بێ سه‌روبه‌ری یه، دڤێت راگه‌هاندن ئامرازه‌ك بیت بۆ پرسێن نه‌ته‌وه‌ی و نیشتیمانی، لێ به‌رۆڤاژی ڤێ چه‌ندێ هژماره‌كا كه‌نالێن راگه‌هاندنێ و سۆشیال میدیا ل دژی بهایێن نه‌ته‌وه‌یی و نیشتیمانی كاردكه‌ن ب ئاراسته‌یا نه شرینكرنا كوردستانێ، له‌ورا پێدڤیه هه‌موو كه‌نالێن راگه‌هاندنێ گۆتاره‌كا ئێكگرتی هه‌بیت دخزمه‌تا پرسا خوه دا نه‌ك نه‌یاران، و نه‌خۆشترین بیرهاتنا من خیانه‌تا شازده‌ی ئۆكتۆبه‌رێ بوو، كو بێ هیڤی بوونه‌كا سه‌یر ئه‌ز دلگران كرم و نوكه ژی باندۆرا خوه یا هه‌ی كا بۆچی كورد ب خوه خیانه‌تێ ل خوه دكه‌ن و تاكه هیڤیا من دیتنا وێ رۆژێ یه ئه‌م كورد ببینه ده‌وله‌ت.
ناڤهاتی، خه‌لكێ گوندێ درێ یه سه‌ر ب قه‌زا مێرگه‌سۆر ڤه، ل سالا 1975 ژدایكبوویه، هه‌ر ل وێ سالێ ژبه‌ر تێكچوونا شۆڕه‌شێ ئاوه‌ری وه‌لاتێ ئیرانێ بوویه، ل وێرێ په‌یمانگه‌ها ته‌كنیكی ب دووماهی ئینایه، ل سالا 1997 ڤه‌گه‌ریایه هه‌رێما كوردستانێ و هه‌ر ل وێ سالێ ل ده‌زگه‌هێ گولان یێ ره‌وشه‌نبیری و راگه‌هاندنێ ده‌ست بكاربوویه، هه‌تا نوكه ل زاگرۆس تیڤی و كوردستان تیڤی یێ به‌رده‌وامه، ل سالا ل كولیجا یاسا هاتیه وه‌رگرتن و پشتی ده‌رچۆنێ ل دادگه‌ها هه‌ولێرێ ده‌ست ب كار بوویه و نوكه رێڤه‌به‌رێ راگه‌هاندنا جڤاتا دادوه‌ری یه.
