هودا سه‌بری: هه‌كه هه‌ڤڕكی نه‌بیت پێشكه‌فتن نابیت
ئه‌ڤرۆ، هه‌رهین محه‌مه‌د:
هونه‌رمه‌ندا شێوه‌كار (هودا سه‌بری) د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دیاركر كو ئه‌و ژ هونه‌رێ شێوه‌كاری دوور نه‌كه‌فتی یه و بتنێ كارێن هونه‌ری ل ده‌ڤ وێ كێم بووینه، به‌لێ نوكه مژوولی كاره‌كێ دی یه و ئه‌و كار گه‌له‌ك ده‌مێ وێ دبه‌ت و ده‌مێ ئه‌و كاره‌كێ هونه‌ری بكه‌ت دڤێت چار هه‌تا پێنج ده‌مژمێران یا ڤالا بیت و وی ده‌می بۆ كارێن هونه‌ری ته‌رخان كه‌ت.
هودایێ گۆت ژی: من چو ره‌نگێن ده‌ستنیشانكری نینن كو پتریا كه‌ڤالێن خوه وی ره‌نگی ب كاربینم، چونكۆ بابه‌تێ ره‌نگان كه‌ڤال دخوازیت كا دێ كیژ ره‌نگی دانمه سه‌ر كه‌ڤالی، ب دروستی كارێ من دیزاینه و نه‌شێم خوه گرێده‌م ب شێوازه‌كی ڤه، لێ هه‌موو شێوازێن هونه‌ری ل ده‌ڤ من د جوانن و دشێم مفایی ژی َوه‌رگرم بۆ هه‌ر هزره‌كا من هه‌بیت ئه شێوازه چو ریالیزمی بیت یان هه‌ر شێوازه‌كێ دی بیت و د كارێ شێوه‌كاریێ دا هه‌ڤڕكی هه‌را یا هه‌ی و هه‌كه هه‌ڤڕكی نه بیت پێشكه‌فتن و نوویاتی نابیت و چ ئه‌ز هه‌ڤركیا شێوه‌كاره‌كی بكه‌م، یان شێوه‌كاره‌ك یا من بكه‌ت.
ل دووماهیێ ناڤهاتیێ گۆت: هه‌تا نوكه كه‌ڤالێن من نه‌هاتینه فرۆتن و كه‌ڤالێن چو شێوه‌كاران نه‌هاتینه فرۆتن هه‌تا كو یێن من بهێنه فرۆتن و ب مخابنی ڤه خه‌لكێ مه حه‌ز ژ كه‌ڤالێن بازرگانی دكه‌ت.
