بنگه‌هه‌ك بۆ پاراستنا كلتۆرێ كوردی ڤه‌كری یه
ئاكرێ، ره‌مه‌زان زه‌كه‌ریا:
هژماره‌كا كوردێن باكۆرێ كوردستانێ، كو ئاكنجیێن چه‌ركه‌سكێ ل سنورێ د ناڤبه‌را توركیا و بۆلگاریا دا نه، بۆ پاراستنا كلتۆرێ كوردی بنگه‌هه‌كێ ره‌وشه‌نبیری ڤه‌كریه.
به‌هجه‌ت جمعا سه‌لیم، دامه‌زرێنه‌رێ وی بنگه‌هی بۆ ئه‌ڤرۆ گۆت: د بنه‌ره‌ت دا ئه‌م كوردێن باشۆرین، ئانكو ژ هه‌رێما كوردستانێ ینه، ژ عه‌شیره‌تا دۆسكی ل ده‌ڤه‌را به‌هدینان، به‌لێ ده‌مێ چه‌ندین سالایه ژیانامه كه‌فتیه باكۆرێ كوردستانێ و ل جۆله‌مێرگێ ئاكنجی بووینه، به‌لێ ژبه‌ر كارێن فه‌رمی و ده‌وامێ دل گه‌ل سێ برایێن خوه ژیانێ ل چه‌ركه‌سكێ دبوورینین، و پشتی خانه‌نشین بوویم من هزرا دامه‌زراندنا بنگه‌هه‌كێ ره‌وشه‌نبیری كر بۆ پاراستن و خزمه‌تكرنا كلتۆرێ كوردی دا ئه‌ڤ بنگه‌هـه ببیته ناڤه‌نده‌ك بۆ كۆمكرنا كوردان ئه‌وێن ل باكۆر ئاكنجی یان ئه‌وێن ل پارچێن دی یێن كوردستانێ سه‌ره‌دانا باكۆر دكه‌ن، ئه‌ڤ بنگه‌هه بێ به‌رامبه‌ر پێشوازیێ ل مانا وان گه‌شتیارێن كورد دكه‌ت كو سه‌ردانا وان دكه‌ن، ل گه‌ل وێ چه‌ندێ بزاڤێ دكه‌ین زمانێ فه‌رمیێ كوردی نیشا زارۆیان بده‌ین.
زێده‌تر گۆت: ژبلی كارێ ره‌وشه‌نبیری و كلتۆری ل ناڤا بنگه‌هی كارێن خێرخوازی ژی دكه‌ین بۆ كه‌سێن نه‌خۆش و هه‌ژارێن كورد بتنێ كورد ل هه‌ر چوار پارچێن كوردستانێ بێ جوداهی، بۆ نموونه به‌ری نوكه مه شیایه 257 هزار دۆلاران بۆ زارۆیه‌كێ كورد كۆم بكه‌ین ل ده‌ڤه‌را بۆتان كو چاره‌سه‌ریا وی ل ئه‌مریكا بوو، ژبلی كو ب رێیا سندوقه‌كا خێرخوازێ پشته‌ڤانیا لاوان دكه‌ین بۆ پێكئینانا ژیانا هه‌ڤژینیێ، ل گه‌ل چه‌ندین جۆره چالاكیێن دی بۆ پتر خزمه‌تكرنا كوردستانێ ئه‌نجام دده‌ین.
