ره‌ڤین سه‌عید: حه‌ز دكه‌م من جهه‌كێ تایبه‌ت هه‌بیت به‌رهه‌مێن خوه لێ بفرۆشم
دهۆك، شاكر ئه‌تروشی:
ره‌ڤین سه‌عید محه‌مه‌د، كچه‌كا ده‌ست ره‌نگینه، خه‌لكا پارێزگه‌ها دهۆكێ یه، د دیداره‌كێ دا بۆ رۆژناما ئه‌ڤرۆ دبێژیت: د به‌رێ دا دایكا من ئه‌ڤ كاره دكر، ئانكو(كراسێن زارۆیان و ده‌زگۆرك و گۆره و لحافه و كولاڤ) و گه‌له‌ك تشتێن دی بۆ مه‌زن و زارۆیان چێدكرن، له‌ورا ب بۆرینا ده‌می ئه‌ز ژی ل به‌ر ده‌ستێ وێ فێر بووم، لێ نوكه ئه‌و نه‌شێت كاربكه‌ت، لێ ئه‌ز و خویشكه‌كا خوه به‌رده‌وامیێ ب كارێ وێ دده‌ین و ب رێیا سۆشیال میدیایێ به‌رهه‌مێن خوه دفرۆشین.
ره‌ڤینێ گۆت: پشتی داخوازی ب بۆ من دهێن ئه‌ز (سوفی) ژ بازاری دكڕم و بۆ وان چێدكه‌م، هه‌تا به‌ری دو سالان ژی كارێ مه یێ باش بوو، لێ ئه‌ڤه ده‌مه‌كه ژبه‌ر كاودانان گه‌له‌كێ لاواز بووی و بكڕێن مه یێن كێم بووین، لێ هه‌رچاوا بیت ئه‌م ده‌ستان ژێ به‌رناده‌ین، چنكو مه دڤێت ئه‌ڤ پیشه به‌رده‌وام دناڤ مالامه دا بمینیت، هه‌لبه‌ت جوداهیه‌كا مه‌زن دناڤیه‌را وان تشتان دا هه‌یه ئه‌وێن مرۆڤ ب ده‌ستێن خوه چێدكه‌ت، ل گه‌ل ئه‌وێن ل كارگه‌هان دهێنه چێكرن، هه‌لبه‌ت كارێ ده‌ستی پتر یێ مۆكمه و دێ زێده‌تر ل ده‌ف خودانی مینیت، بۆ نه‌موونه گۆره هه‌بوویه مه بۆ هنده‌ك كه‌سان چێكری پتری دوسالان بكارئینایه و چو زیان نه گه‌هشتینێ و حه‌زدكه‌م ل سالێن بهێن جهه‌كێ تایبه‌ت وه‌ك دوكانه‌كێ ڤه‌كه‌م و به‌رهه‌مێن خوه لێ نیشابده‌م و بفرۆشم لێ مخابن چو پشته‌ڤانی نینه.
