رزگاربوویێن ده‌ستێن تیرۆرستێن داعش كه‌لتۆرێ خوه ب رێیا مۆزیكی د پارێزن
ئه‌ڤرۆ، دلڤین ره‌شید:
ره‌نا سلێمان، به‌رپرسا گرۆپێ ئاشتی بۆ رۆژناما ئه‌ڤرۆ دیار كر كو كو گرۆپێ ئاشتیێ ژ 14 كچێن شنگالێ پێكهاتیه، ل ده‌ستپێكی وێ خۆلێن مۆزیكی ڤه‌كرن و گۆت: “د ڤان خۆلان دا من ئامیرێ ده‌فێ هه‌لبژارت، ژ به‌ركو د ئایینێ ئیزدیان دا ده‌فێ پیرۆزیا خوه هه‌یه، د ناڤ گرۆپێ مه دا كچێن رزگاربویێن ده‌ستێن تیرۆرستێن داعش هه‌نه، راسته ئه‌ڤ كچه تووشی زولمێ بووینه و نه‌خۆشی دیتینه، به‌لێ دخوازن ب رێیا مۆزیكی كه‌لتۆرێ خوه بپارێزن”.
به‌رپرسا گرۆپێ ئاشتی گۆت: “ئه‌ز باوه‌رم ل سه‌رانسه‌ری پارێزگه‌ها دهۆكێ، ئه‌ڤه گرۆپێ دویێ یێ ئافره‌تانه مۆزیكێ د ژه‌نن، ئه‌ڤه دده‌مه‌كی دایه كو د دیرۆكا ملله‌تێ ئێزدی دا رێژا هه‌ره مه‌زن زه‌لامان ئه‌ڤ كه‌لتۆره پاراستینه، مه خواست ژنا ئێزدی ژی مل ب ملێ زه‌لامی و بێ جوداهی كه‌لتۆرێ خوه بپارێزن”.
ل دووماهیێ ناڤهاتیێ گۆت: سه‌ره‌رایێ ڤێ نه‌هامه‌تیا ب سه‌رێ خه‌لكێ مه یێ شنگالێ دا هاتی ئه‌م شیان ب رێیا مۆزیكی ئێش و ئازارێن خوه بگه‌هینینه وه‌لاتێن جیهانێ، هه‌تا نوكه ئه‌ڤ گرۆپه ب شێوه‌یه‌كێ خوه‌به‌خش كار دكه‌ت، راسته ئه‌م ئاوه‌ره‌ینه و ژیانا د ناڤ كه‌مپان دا یا ب زه‌حمه‌ته، به‌لێ هه‌بوونا مه دگه‌ل مۆزیكی بارێ مه یێ ده‌روونی سڤكتر لێ كریه.
