شه‌ڤگه‌ر زازا سوپاسیا كۆرۆنایێ دكه‌ت
دهۆك، شاكر ئه‌تروشی:
سترانبێژێ دووری وه‌لات (شه‌ڤگه‌ر زازا) كوخه‌لكێ رۆژئاڤایێ كوردستانێ یه، لێ ئه‌ڤه چه‌ند ساله ل وه‌لاتێ سوید دژیت: د دیداره‌كێ دا بۆ رۆژناما ئه‌ڤرۆ گۆت: د پتریا دیدارێن خوه یێن چار سالێن بۆری دا من ئه‌ڤه گۆتیه و نوكه ژی دێ بێژم ( سوپاس بۆ كۆرۆنایێ) چنكو به‌ری هاتنا كۆرۆنایێ من هند ده‌مێ ڤالا نه‌بوو كو كارێن هونه‌ری و ئه‌ده‌بی ئه‌نجام بده‌م، لێ پشتی كۆرۆنا هاتی و ژنه‌چاری ئه‌م د مالدا هێلاین، من ژی ده‌لیڤه ژ ده‌ست نه‌ده و كارێ خوه دمالدا كری، كارێ ئێكێ من سیدیه‌ك چێكر كو ژ ده‌ه سترانان پێك دهێت، مۆزیكا وان ل وه‌لاتێ تۆركیا هاتیه تۆماركرن و بتنێ ده‌نگێ من مایه، ئه‌و ژی ل نێزیك دێ تۆماركه‌م، كارێ دویێ ژی من (11) دیوانێن هه‌لبه‌ستان هه‌نه جاره‌كا دی من پێداچوون تێداكر و بۆ چاپێ به‌رهه‌ڤكرن، دو دیوان هاتنه چاپكرن، سیدی ژی یێ به‌ر ب قوناغێن دووماهیێ دچیت و ل ده‌مێ دهێت دێ وی ژی به‌لاڤ كه‌م، له‌ورا من گۆت سوپاس كۆرۆنا هه‌كه تۆ نه‌هاتبای من ژی ئه‌ڤ چه‌نده هوسا ب ساناهی ئه‌نجام نه ددا.
هه‌روه‌سا گۆت: ئه‌ڤه (51) ساله ئه‌ز سترانان دبێژم و كارێ من پتر گێڕانا ئاهه‌نگانه ل ناڤ پێشمه‌رگه‌ی و نوكه ژی ئه‌ز به‌رده‌وام دهێمه كوردستانێ و ل ناڤ سه‌نگه‌رێن پێشمه‌رگه‌ی سترانان دبێژم، له‌ورا ئه‌ز ب هونه‌رمه‌ندێ پێشمه‌رگه) دهێمه نیاسین و هیڤیا من ئه‌وه ژیێ من یێ مای ژی هه‌موو ل گه‌ل پێشمه‌رگه‌ی و بۆ خزمه‌تا وان بیت.
ل دووماهیێ گۆت: من ل به‌ره ل شواتا سالا بهێت بهێمه كوردستانێ و ل وێرێ دێ دو دیوانێن خوه چاپكه‌م، به‌س هه‌رده‌م ئه‌ز دبێژم مخابن ده‌مێ هونه‌رمه‌ند دمرن ژنوو هه‌ر حزبه‌ك یان كه‌سه‌ك ب به‌ژن و بالا وی دبێژن، به‌لێ ب ساخیا وی بۆ چو ناكه‌ن، له‌ورا ده‌مێ ئه‌ز دمرم ژی بلا ئه‌و كه‌س و لایه‌ن نه‌هێنه تازیا من ژی
