رۆشه‌نێ دڤێت سه‌ره‌دانا كوردستانێ بكه‌ت
زاخۆ، عه‌لی حاجی:
رۆشه‌ن، سترانبێژه‌كا خه‌لكا باكۆرێ كوردستانێ یه، د دیداره‌كێ دا بۆ رۆژناما ئه‌ڤرۆ دبێژیت: د ژیه‌كێ بچووك دا ب رێیا شه‌ڤبێریان ژ دوتمام و پسمامێن خوه ئه‌ز فێری سترانگۆتنێ بووم، لێ مخابن پشته‌ڤانی بۆ كچ و ژنێن سترانبێژ د ئاسته‌كێ كێم دایه و دخوازم ژی سترانان ل گه‌ل هنده‌ك سترانبێژێن باشورێ كوردستانێ بێژم.
زێده‌تر گۆت: ژبه‌ركو گه‌له‌ك جاران د شه‌ڤبێریان دا ل گه‌ل دوتمام و پسمامێن خوه مه ستران دگۆتن و هه‌تا نوكه ژی یا به‌رده‌وامم، هه‌ر چه‌نده ل ده‌ستپێكێ دایك و بابێ من رێگر بوون كو سترانان بێژم به‌لێ نوكه دا پشته‌ڤانیێ ل من دكه‌ن ژبه‌ركو ئه‌ز نه‌شێم بێ ستران بژیم، و هه‌تا نوكه من شیایه سێ سترانان تۆماربكه‌م و دوماهی سترانا من ژی ل حه‌فتیا بۆری به‌لاڤ ببوو، ئه‌و ژی ب ناڤێ (وه‌ره كه‌چكێ) بوو، بۆ زانین ئه‌ز حه‌ز ناكه‌م هنده‌ك سنوران ب دانم د ستایلێن سترانگۆتنێ دا به‌لكو ب گه‌له‌ك ستایلان وه‌ك (پۆپ و كلاسیك) دبێژم، زێده‌باری سترانێن داوه‌تان.
ل دووماهیێ گۆت: ل وه‌لاتێ توركیا پشته‌ڤانی ل هونه‌رمه‌ندێن كورد دئاستێ پێدڤی دا نینه به‌لێ سنرانبێژ ل دووف شیانێن خوه سترانان تۆماردكه‌ن و كلیپان چێدكه‌ن و من تێكه‌لی ل گه‌ل سترانبێژێن باشورێ كوردستانێ هه‌یه و گوهداریا سترانێن وان دكه‌م و دخوازم ژی سه‌ره‌دانا كوردستانێ بكه‌م و سترانێن دوقۆلی ل گه‌ل هنده‌ك سترانبێژان تۆماربكه‌م.
