لوبنانێ دڤێت په‌یوه‌ندیێن خوه ل گه‌ل سعوودیێ باش بكه‌ت
ئه‌ڤرۆ:
نه‌جیب میقاتی سه‌رۆك وه‌زیرێن لوبنانێ راگه‌هاند كو داخۆیانیێن به‌ری چه‌ند رۆژان یێن حه‌سه‌ن نه‌سروللا سه‌رۆكێ حزبوللا لوبنانێ خزمه‌تا به‌رژه‌وه‌ندیێن وه‌لاتی ناكه‌ن و دڤێت لوبنان په‌یوه‌ندیێن خوه ل گه‌ل سعوودیێ و وه‌لاتێن دی یێن عه‌ره‌بی باش بكه‌ت، چونكو ره‌وشا ناڤخوه‌یی یا لوبنانێ گه‌له‌ك خرابه و د ده‌مه‌كێ وه‌سا دا دڤێت لوبنان په‌یوه‌ندیێن خوه ل گه‌ل هه‌موو وه‌لاتێن عه‌ره‌بی ب تایبه‌تی ژی سعوودیێ باش بكه‌ت و گۆت: (داخۆیانیێن حه‌سه‌ن نه‌سروللا د جهێ خوه دا نینن و دڤێت حزبوللا نه‌بیته ئه‌گه‌رێ هندێ كو ره‌وشا ناڤخوه‌یی یا لوبنانێ پتر ئالۆز ببیت، چونكو براستی ژی نها لوبنان پتر ژ هه‌ر ده‌مه‌كێ پێدڤی ب پشته‌ڤانیێ یه).
ئه‌و یه‌ك د ده‌مه‌كێ دایه كو به‌ری چه‌ند رۆژان سه‌رۆكێ حزبوللا لوبنانێ دیار كربوو كو سعوودیێ بوویه ئه‌گه‌رێ ئالۆزبوونا ره‌وشا رۆژهه‌لاتا ناڤین و سعوودیێ پشته‌ڤانیێ ل داعشێ و گرۆپێن دی یێن تیرۆرستی ل رۆژهه‌لاتا ناڤین دكه‌ت و هه‌لوه‌ستێ سعوودیێ ژ ئالیێ گه‌له‌ك وه‌لاتێن عه‌ره‌بی و ئیسلامی ڤه ناهێته قه‌بوولكرن.
چاڤدێرێن سیاسی ژی دیار دكه‌ن كو ژ به‌ر ده‌ستێوه‌ردانێن حزبوللا لوبنانێ و ئیرانێ ره‌وشا لوبنانێ گه‌له‌ك خرابه، ژ به‌ر هندێ ژی سه‌رۆك وه‌زیرێن نها یێ لوبنانێ دڤێت په‌یوه‌ندیێن خوه ل گه‌ل سعوودیێ و وه‌لاتێن دی باش بكه‌ت، لێ مخابن ژ به‌ر هه‌لوه‌ستێ خراب یێ حزبوللا لوبنانێ هه‌تا نها ژی لوبنانێ نه‌شیایه خوه ژ وێ قه‌یرانێ قورتال بكه‌ت كو به‌ری چه‌ند سالان تووشی بووی، ب تایبه‌تی ژی پشتی په‌قینا به‌یرۆتێ زیانێن گه‌له‌ك مه‌زن گه‌هشتینه ئابووریا لوبنانێ و ئاشكرایه هه‌تا لوبنان په‌یوه‌ندیێن خوه ل گه‌ل سعوودیێ و وه‌لاتێن دی یێن عه‌ره‌بی ئاسایی نه‌كه‌ت نه‌شێت خوه ژ ره‌وشا نها یا ئالۆز ژی قورتال بكه‌ت.
