په‌یداكرنا سپۆنسه‌ران بۆ كارێن هونه‌ری یا ب زه‌حمه‌ته
دهۆك، زنار تۆڤی:
سۆزدا عه‌مۆ، سترانبێژه‌كا خه‌لكا عه‌فرینێ یه ل رۆژئاڤایێ كوردستانێ و نوكه ل باژێرێ هه‌ولێرێ دژیت، د دیداره‌كێ دا بۆ رۆژناما ئه‌ڤرۆ دیاركر كو وێ سترانه‌كا نوو ب ناڤێ (هادا حلو) ب زمانێ عه‌ره‌بی تۆماركریه، وێ ل به‌ره ل سۆشیال میدیایێ به‌لاڤ بكه‌ت و كارێ مۆنتاژی و گرافیكی ژ ئالیێ جوان كورداخی ڤه بۆ هاتییه‌كرن و كۆمپانییا میۆزیك ڤۆیس سپۆنسه‌رییا ڤێ سترانێ دكه‌ت.
د دووڤدا گۆت: نوكه سترانه‌كا نوو یا كوردی ل به‌ر ده‌ستێ من هه‌یه، ئه‌ز حه‌زدكه‌م تۆمار بكه‌م، لێ ژبه‌ر نه‌بوونا چو سپۆنسه‌ران هه‌تا نوكه من نه‌شیایه، چنكو ب راستی په‌یداكرنا سپۆنسه‌ران بۆ كارێن هونه‌ری كاره‌كێ ب زه‌حمه‌ته ل كوردستانێ، بۆ زانین من دو سترانێن دی ژی تۆماركرینه، كو ئێك ژوان ب زمانێ عه‌ره‌بی و ئینگلیزی گۆتییه، به‌ری چه‌نده‌كێ‌سترانه‌كا دی ژی ب باژێرێ خوه عه‌فرینێ گۆتیه و مالباتا من گه‌له‌ك پشته‌ڤانییێ ل كارێن من یێن هونه‌ری دكه‌ن، ئه‌و حه‌ز دكه‌ن ب تام و روحیه‌تا كوردی خزمه‌تا هونه‌رێ كوردی یێ ره‌سه‌ن بكه‌م، هه‌روه‌سا هیڤیا من ئه‌وه بشێم هنده‌ك كلیپان چێكه‌م، چونكو نوكه كلیپێ گه‌له‌ك رۆلێ خوه و سترانبێژ ب چێكرنا كلیپان دهێنه نیاسین.
